Нема крај на проблемите на европските економски мотори Германија и Франција

Деловната активност на приватниот сектор во Франција опадна четврти месец по ред бидејќи се намалува довербата по падот на владата поради спорот за буџетот.

Индексот на менаџери за набавка S&P Global во Франција во декември изнесува 46,7, останувајќи под прагот од 50, граница што го дели растот од намалувањето. Сепак, тоа претставува мал напредок од минатиот месец и исто така подобар резултат од очекувањата на аналитичарите во истражувањето на „Блумберг“. Производството и услугите исто така останаа во областа на контракции.

Движење на индексот на нарачки во производствениот и услужниот сектор Bloomberg Mercury

„Кризата во Франција не покажува знаци на попуштање “, рече Тарик Камал Чодри, економист во Хамбуршката комерцијална банка, кој не гледа надеж за скорашно закрепнување. „Индустрискиот сектор останува Ахилова петица на француската економија, па дури и услужниот сектор со релативно подобрите перформанси не успева да обезбеди некаков поттик за раст“, напоменува тој.

Француската политика е во криза од почетокот на јуни, кога претседателот Емануел Макрон распиша предвремени парламентарни избори. Гласањето резултира со застој, а Мишел Барние, кој во септември беше назначен за премиер, не успеа да оформи мнозинство, па месецов отстапи од функцијата. Во петокот беше именуван друг премиер, Франсоа Бајру, но останува нејасно како тој би можел да ги подобри работите.

„Бајру нема поддршка ниту од левицата ниту од десницата, што сугерира дека може да се соочи со истата судбина како Барние. Се чини дека нестабилноста ќе потрае“, рече Чодри.

Економијата на Франција годинава веројатно ќе порасне за 1,1 отсто, и тоа главно помогната од Олимписките и Параолимписките игри во Париз. За 2025 година се предвидува раст од само 0,8 отсто.

Состојбата не е подобра ниту во Германија

Падот на германската деловна активност малку забави во декември благодарение на заживувањето на услужниот сектор, иако борбите на производителите се влошија.

Индексот на менаџери за набавка S&P Global за Германија се зголеми на 47,8 од 47,2 во ноември, задржувајќи се, исто како и Франција, под прагот од 50, односно границата меѓу раст и пад, покажуваат денешните податоци. За разлика од Франција, во Германија индексот за услугите се зголеми на 51 од претходните 49,3.

Bloomberg Mercury

„Ова подобрување во услужниот сектор е добра противтежа на брзиот пад на производството, давајќи одредена надеж дека БДП можеби нема да се намали во последниот квартал од годината“, рече Сајрус де ла Рубија, економист во Хамбуршката комерцијална банка. „Преработувачкиот сектор не испорача никакво празнично расположение. Производството падна многу побрзо отколку во претходните два месеца, а новите нарачки опаѓаат со можеби најбрза стапка годинава“, вели тој.

Најголемата европска економија веројатно ќе се соочи со пад втора година по ред поради намалената побарувачка од странство и скокот на цените на енергијата што следуваше по руската инвазија на Украина. На повидок се и нови предизвици од можните трговски давачки што ги најавуваат САД и политичката неизвесност пред предвремените избори.

„Бундесбанк“ минатата недела ги намали прогнозите за раст за оваа и следната година, предвидувајќи дека БДП во 2024 година ќе се намали за 0,2 отсто, а во 2025 година ќе се зголеми за исто толкав процент.