Мексико верува дека сигурно ќе постигне договор со САД за да ги избегне новите царини

Мексико верува дека ќе се одбрани од новиот сет царини од 30 проценти што претседателот Доналд Трамп вчера се закани дека ќе ги воведе од следниот месец. При тоа, разговорите за да се избегне најлошото сценарио веќе се во тек.

Откако Трамп јавно го објави својот план преку објавување на социјалните медиуми, мексиканската претседателка Клаудија Шајнбаум во говорите во близина на северната граница истакна дека секоја земја добива писмо од Трамп додека тој спроведува глобални протекционистички политики. Нејзиниот тим веќе започна разговори со САД во петокот и таа е уверена дека Мексико ќе постигне договор.

„Имаме одредено искуство со овие работи веќе неколку месеци“, рече Шајнбаум на отворањето на клиника во Енсенада, Баха Калифорнија. „И мислам дека ќе постигнеме договор со владата на Соединетите Американски Држави.“

Односите Мексико-САД од јуни се во малку турбулентен период со зголемени апсења на мигранти од страна на американски агенти, затворање на границата за добиток поради наезда од црви во Мексико, осврт на американскиот државен обвинител Пам Бонди кон соседната земја како противник и финансискиот удар од страна на американското Министерство за финансии врз три мексикански финансиски фирми обвинети за помагање на шверцерите со фентанил. Во писмото, Трамп се заканува со нови царини за Мексико поради тоа што недостига напредок во справувањето со нарко-картелите во земјата.

Но, зад сцената, работата генерално напредува меѓу администрациите на Шајнбаум и Трамп. Мексико е сè уште во поволна позиција во однос на остатокот од светот и е подготвен да оствари корист од протекционистичките политики на САД на среден рок, според Фелипе Хернандез од „Блумберг економикс“.

Таа перспектива претпоставува дека САД нема да ја применуваат стапката од 30 проценти за стоки што се во согласност со договорот за слободна трговија меѓу САД, Мексико и Канада. Тој исклучок е дел од планот, но ситуацијата останува променлива, предупреди американски функционер.

Продолжувањето на исклучоците за Мексико и за Канада го стеснува опсегот на континенталните царини на Трамп, а тоа би било спас за сектори како што е автомобилската индустрија кои во голема мера се потпираат на договорот УСМКА (USMCA), кој одново се договараше за време на првиот мандат на Трамп.

Мексико и САД во петокот формираа нова бинационална работна група за решавање на безбедносните, миграциските и економските прашања, според соопштението објавено во саботата од страна на мексиканскиот министер за економија Марсело Ебрард на социјалната мрежа X. Првата главна задача на групата ќе биде да најде алтернатива на царините и „да ги заштити работните места од двете страни на границата“, се вели во соопштението.

 Марсело Ебрард, министер за економија на Максико Bloomberg Mercury

 

„Кажавме дека овој третман е неправеден и дека не се согласуваме“, се вели во соопштението, заеднички потпишано од министерствата за економија и надворешни работи.

Американскиот претседател рече дека царините од 30 проценти се одвоени од секторските и би можеле да се зголемат ако Мексико возврати.

„Мексико сè уште не ги запре картелите кои се обидуваат да ја претворат цела Северна Америка во игралиште за трговија со наркотици“, напиша Трамп. „Доколку Мексико успее да ги предизвика картелите и да го запре протокот на фентанил, ќе разгледаме прилагодување на ова писмо.“

Во петокот, синот на шефот на нарко-картелот Синалоа, Хоакин „Ел Чапо“ Гузман Лоера, се изјасни за виновен по федералните обвиненија за трговија со дрога и се согласи да соработува со американските обвинители. САД го обвинија картелот Синалоа за водење на трговијата со фентанил, увоз на хемикалии од Кина за производство на апчиња во Мексико и нивно шверцување во САД.

Минатата среда Министерството за финансии на САД го продолжи рокот со кој ќе се исклучат три мексикански финансиски фирми од американскиот финансиски систем за потенцијално помагање во перењето пари од трговијата со фентанил. САД ја пофалија соработката на Мексико во врска со овој потег.

 

Во моментов нема коментари за веста. Биди прв да коментира...

Остави коментар