Неочекуваниот потег на претседателот Доналд Трамп да се закани со царина од 50 проценти за Бразил ризикува да ги потресе глобалните пазари на стоки, нарушувајќи ја трговијата со сè, од говедско месо до кафе.
САД се втор по големина трговски партнер на Бразил, веднаш зад Кина. Но додека двете земји се натпреваруваат директно на некои од пазарите за суровини како пченка и памук, Бразил - земја што важи за земјоделска сила - произведува и тропски производи како кафе, кои не може да се одгледуваат во континенталниот дел на САД.
Бразил ги зголемува испораките на говедско месо за да ја задоволи растечката побарувачка во САД и е клучен снабдувач на дрвена пулпа што се користи во сè, од книги до тоалетна хартија. Тоа поттикнува надежи дека некои сектори би можеле да бидат издвоени или ослободени од царини.
Прочитај повеќе
Поради недостигот од кафе цената расте најдолго во последните 45 години
Кафето е на пат да ја оствари најдолгата победничка низа од 1980 година, бидејќи пазарот се соочува со постојани проблеми.
04.02.2025
Трамп објави нови царински стапки, но останува отворен за преговори
Трамп објави писма до разни нации на социјалните мрежи во понеделникот, почнувајќи со неговата намера да воведе царини од 25 проценти за стоки од Јапонија и Јужна Кореја.
08.07.2025
Што ги движи берзите на БРИКС: Царините на Трамп, Дипсик на Шји или реформите на Лула?
Групата стана значајна политичка и економска сила во последните две децении, врз основа на желбата да се создаде противтежа на западното влијание.
07.07.2025
ББА-коментар: Паѓа цената на шеќерот и на пченицата
Цената на шеќерот во последната година падна за 17 отсто.
14.02.2025
Сепак, силата на Бразил во стоките му дава одредена флексибилност, а земјата би можела да го ублажи влијанието со наоѓање купувачи на друго место.
„Веројатно е дека овие производи ќе мора да се пренасочат“, рече Маркос Фава Невес, професор на бизнис-школата „Рибеирао Прето“ на Универзитетот во Сао Паоло. „Говедското месо се извезува на многу места, сокот од портокал е во недостиг, исто како и кафето“.
Бразилската енергетска и метална индустрија исто така ги проценува потенцијалните влијанија. Анализираме како би можеле да се одразат царините на клучните стоки:
Bloomberg
Кафе
САД лани увезоа кафе од Бразил во вредност од речиси две милијарди долари, според податоците од Министерството за земјоделство на САД. Пратките се приближно 30 отсто од потрошувачката на кафе во САД, соопшти бразилската група на извозници на кафе „Цекафе“ (Cecafé).
„Тоа е загуба за нашите компании и значи повеќе трошоци и поголема инфлација за американските потрошувачи“, рече извршниот директор на „Цекафе“, Маркос Матос.
Бразил е водечки светски производител на премиум сортата арабика, омилената на „Старбакс“ и повеќето специјализирани кафулиња. Цените на зрното веќе се зголемија во текот на изминатата година бидејќи лошите временски услови во Бразил ги загрозија резервите.
Царините за Бразил би можеле да резултираат со „големо“ зголемување на цените на кафето, изјави за телевизијата „Блумберг“ Џузепе Лаваца, претседател на италијанската компанија за печење кафе „Лаваца“.
Говедско месо
Американските производители на месо, денес соочени со најмалото стадо говеда во САД од 1950-тите, се потпираат повеќе на снабдување од земји како Бразил. Побарувачката расте бидејќи потрошувачите на лекови за слабеење бараат храна со висока содржина на протеини. Во 2024 година во САД беше увезено говедско месо од Бразил во вредност од околу 1,4 милијарда долари, според Министерството за земјоделство на САД.
Бразилските производители веројатно ќе ги пренасочат пратките, а производителот на месо „Минерва“ (Minerva SA) вели дека може да го снабдува американскиот пазар со своите операции во Аргентина, Парагвај, Уругвај и Австралија. Сепак, Бразилското здружение на извозници на месо посочи на ризици за „глобалното снабдување и безбедноста на храната“, истовремено ветувајќи преговори меѓу двете земји.
Нафта
Бразилскиот извоз на сурова нафта минатата година за првпат ги надмина сите други странски продажби за најголемата економија во Латинска Америка, при што испораките на нафта и деривати во САД во 2024 година достигнаа вкупно 7,6 милијарди долари.
Бразилската нафтена лоби-група ИБП (IBP) во соопштението наведе дека потегот на царините „носи неизвесност во нафтениот и гасниот сектор, кој денес сочинува 17 проценти од индустрискиот БДП на Бразил и 1,6 милион директни и индиректни работни места во земјата“.
Но, аналитичарите гледаат мал структурен ризик за производството на земјата, со оглед на способноста на Бразил да го пренасочи извозниот тек.
„Бразил има капацитет да ги пренасочи барелите што моментално се извезуваат во САД кон рафинерии во Азија (Кина, Индија), Европа или Блискиот Исток, кои бараат лесна сурова нафта со ниска содржина на сулфур, како што е онаа што се произведува во бразилските полиња“, напишаа аналитичарите на БТГ (BTG Pactual), предводени од Луиз Карваљо.
Аналитичарите исто така гледаат ограничено влијание врз државниот производител на нафта „Петробрас“ (Petrobras), кој извезува поголем дел од својата сурова нафта во Кина.
Bloomberg
Сок од портокал
Бразил учествува со околу 70 проценти во глобалниот извоз на сок од портокал и игра значајна улога во снабдувањето на САД бидејќи смртоносна болест на цитрусните овошја се прошири низ плантажите на Флорида.
Иако истата болест погодува и некои области на Бразил, североисточниот дел од земјата е во голема мера недопрен и го зголемува производството. Фјучерсите за сок од портокал вчера се зголемија за дури шест проценти, достигнувајќи највисока цена во последниот месец.
Новата царина би била многу повисока од постојната стапка од 415 долари по тон што се применува на испораките на бразилски сокови, што значи такса еквивалентна на повеќе од 70 отсто од вредноста на производот, изјавија од индустриската група „Цитрус БР“ (CitrusBR). „Тоа би ги направило испораките неизводливи“, изјави извршниот директор Ибијапаба Нето.
„Сега мора да го забрзаме производството за да ги испорачаме нарачките што сè уште ги имаме што е можно побрзо пред да стапат во сила даноците“, рече Брајан Соуза, раководител на глобалните операции во „Сумо Бразил“ (Sumo Brasil), компанија што произведува замрзнат концентриран сок од портокал.
Етанол
Бразил го зголемува својот капацитет за претворање на пченка и шеќерна трска во етанол, биогориво што често се меша со бензин. САД се клучен пазар, а стимулациите во Калифорнија за горива со ниска содржина на јаглерод помогнаа да се зголемат испораките на етанол на околу 300 милиони литри минатата година. Ризикот од одмазда би ги ограничил и испораките во Бразил од САД, изјави Бруно Лима, директор за бизнис со меки производи во „Стоун екс“ (StoneX).
Целулоза и хартија
Бразил е дом на компанијата „Сузано“ (Suzano SA), најголемиот светски извозник на целулоза што се користи во производи како тоалетна хартија. Целулозата е четвртиот најголем земјоделски извоз на Бразил во САД, а хартијата и иверицата се исто така меѓу главните стоки, според Министерството за земјоделство и сточарство на Бразил. Главниот извршен директор на „Сузано“, Жоао Алберто де Абреу, во мај изјави дека компанијата ги пренесува трошоците за царини - кои во тоа време беа 10 проценти - на американските купувачи. „Сузано“ е најизложена на царини меѓу бразилските производители на стоки, бидејќи околу 15 проценти од приходите на компанијата доаѓаат од САД, напиша аналитичарот на „Сити“, Габриел Бара.
Шеќер
Иако голем дел од американскиот шеќер историски се произведувал дома или се увезувал од Мексико, пратките од Бразил, водечкиот светски производител на шеќер, доживеаја бум. САД лани увезоа рекордно количество од таа земја, надминувајќи милион метрички тони, според УСДА (USDA).
САД го ограничуваат количеството шеќер што може да се увезе со ниски такси и во фискалната 2025 година доделија околу 14 проценти од таа понуда за Бразил. Дополнителните бразилски пратки што подлежат на повисоки такси достигнаа вкупно над 265.000 тони до крајот на мај, рече Мајк Мекдугал, аналитичар во „Мекдугал глобал вју“ (McDougall Global View).
Челик
Бразилската челична индустрија не гледа никакво директно влијание од царината објавена од Трамп, бидејќи секторот веќе беше предмет на таа стапка според членот 232 од Законот за проширување на трговијата, рече Марко Поло де Мело Лопес, извршен директор на индустриското здружение „Ачо Бразил“ (Aço Brasil).
Меѓутоа, овој потег може да ги влоши односите меѓу Бразил и САД, отежнувајќи го повторното воспоставување на преговорите за трговија со челик што може да вклучуваат извозни квоти за полуготови производи, рече Лопес.
Бразилските челичарници произведоа околу 60 проценти од сите плочи увезени од САД минатата година за да ја прехранат својата индустрија.
Акциите на рударските и челичните компании пораснаа во Сао Паоло поради облозите дека зголемувањето на цените на стоките и ограничената изложеност на САД ќе им помогне да ја пребродат бурата.
- Текстот е напишан со помош од Фернандо Траваљини, Натан Рисер, Мајкл Хирцер, Беатриз Реис, Барбара Насименто и Леда Алвим.
.webp){kind=icon}
