Почнува трговската војна: ЕУ подготвува царински контрамерки за САД

Европската Унија (ЕУ) од денеска почнува да работи на воведување контрамерки против новите американски царини за метали, а планот е да наметне свои давачки за американските стоки во вредност од 26 милијарди евра (28,3 милијарди долари).

Соопштението следуваше неколку часа откако американската администрација воведе царини од 25 отсто за увозот на челик и на алуминиум во масовната ескалација на трговската војна меѓу двата долгогодишни сојузници. ЕУ веднаш ќе започне со консултации со земјите членки, а царините би требало да бидат усвоени во средината на април.

„Контрамерките што ги преземаме денес се силни, но сразмерни“, рече претседателката на Европската комисија, Урсула фон дер Лајен, за новинарите на брифингот во Стразбур. „Ние цврсто веруваме дека во свет полн со геоекономска и политичка несигурност, не е во наш заеднички интерес да ги оптоваруваме нашите економии со такви царини“.

Фјучерсите на европските акции рано утрово пораснаа бидејќи трговците реагираа на напредокот во врска со прекинот на огнот во Украина. Еврото падна за околу 0,3 проценти по три дена раст.

За Европа новите давачки ќе бидат речиси четири пати поголеми од сличните давачки наметнати за време на првиот мандат на Трамп, кога САД целеа на речиси седум милијарди долари од извозот на метали на блокот, повикувајќи се на загриженост за националната безбедност. ЕУ ќе цели на американските производи од челик и алуминиум, како и текстил, виски, земјоделски производи и апарати за домаќинство.

ЕУ исто така ќе ги погоди и производите од претходната трговска борба со Трамп, како што се чамци и мотори, се наведува во соопштението.

Bloomberg Mercury

 

Покрај тоа, Трамп најави реципрочни царини, кои ќе се воведат на почетокот на април врз основа на политиките на партнерите што се сметаат за пречки за трговијата со САД, вклучувајќи го и европскиот данок на додадена вредност, а дополнително целеше на одредени стоки, вклучувајќи ги и европските автомобили.

Шефот за трговија на ЕУ, Марош Шефчовиќ, минатиот месец отпатува во Вашингтон за да се обиде да најде пријателско решение со високи членови на тимот на Трамп, вклучувајќи го и американскиот министер за трговија Хауард Лутник. Тој понуди ЕУ да ги намали царините за индустриските стоки, вклучувајќи и автомобили, што инаку е едно од долгогодишните барања на Трамп, како и Унијата да го зголеми увозот од САД на течен природен гас и производи од доменот на одбраната.

„Може да се избегне нарушувањето предизвикано од царините доколку американската администрација ја прифати нашата подадена рака и работи со нас за да постигнеме договор“, рече Шефчовиќ во средата. „Подготвени сме да преговараме“, додаде тој.

Брисел претходно соопшти дека ќе возврати на секој чекор на САД, и тоа брзо и пропорционално, како и дека работи со месеци на различни списоци на стоки што би биле погодени, вклучувајќи ги и политички чувствителните производи од одредени американски изборни единици, кои би нанеле поголема економска болка на американската страна отколку на европската економија.

Извоз на САД во ЕУ во 2023 година (по производи што би биле опфатени со контрамерките) Bloomberg Mercury

 

На европскиот пазар на челик, производителите се подготвуваат за двократно влијание, при што европскиот извоз во САД ќе опадне, а увозот во регионот ќе се зголеми бидејќи се пренасочува металот од САД.

„Навистина може да очекуваме пазарот на ЕУ, кој веќе е заситен со евтин увоз на челик од Азија, Северна Африка и Блискиот Исток, дополнително да биде преплавен бидејќи челикот наменет за американскиот пазар сега ќе се пренасочува поради новите царини“, рече портпаролот на индустриската лоби-група „Еурофер“ (Eurofer).

За време на првиот претседателски мандат на Трамп, на секои три тони челик што се оддалечија од американскиот пазар поради царините, два тона отидоа во ЕУ, рече портпаролот.

И производителите на алуминиум исто така се подготвуваат за пораст на увозот, особено од Канада, која обично испорачува повеќе од половина од алуминиумот што го увезува САД.

Bloomberg Mercury

 

За ЕУ, борбата во врска со американските царини за метали започна уште во 2018 година, за време на првиот мандат на Трамп, кога САД преку наметнатите давачки го погодија европскиот извоз на челик и на алуминиум, повикувајќи се на загриженост за националната безбедност. Во тоа време официјалните лица во Брисел се потсмеваа на идејата дека ЕУ претставува таква закана.

Блокот од 27 нации возврати со целење на политички чувствителни компании со одмазднички мерки, вклучувајќи ги и мотоциклите „харли дејвидсон“ (Harley-Davidson Inc.) и фармерките „левис“ (Levi Strauss & Co).

Во 2021 година двете страни се согласија на привремено примирје, кога САД делумно ги укинаа своите мерки и воведоа царински квоти над кои се применуваат давачките за металите, додека ЕУ ги замрзна сите свои рестриктивни мерки.

Сите суспендирани тарифи за метали треба целосно да се обноват, вклучувајќи и активирање некои давачки што никогаш претходно не биле во сила. Како прв чекор, сите суспендирани царини на ЕУ за американски производи во вредност од околу осум милијарди долари треба да се вратат во сила на крајот на март.