Кинеските извозници не веруваат дека царинското примирје меѓу Шји и Трамп ќе трае долго

Кинеските извозници се охрабрени од пониските американски царини по вчерашната средба меѓу лидерите на двете економски суперсили, но велат дека сè уште сакаат да се заштитат од какви било идни проблеми во билатералните трговски врски.

И за купувачите и за продавачите на стоки за широка потрошувачка во САД ризиците од потпирање исклучиво на Кина за производство на сè, од брза мода до украси за празниците, почнаа да ја надминуваат предноста на земјата како центар за евтини производи. Дури и со трговското примирје, американските трговци на мало веројатно нема да ги преиспитаат плановите за преместување на синџирите за снабдување надвор од Кина, а кинеските производители се посветени на проширување на извозот на пазари надвор од САД за да ја намалат својата ранливост.

„Намалувањето на царините ни купува повеќе време“, рече Хуанг Лун, менаџер за продажба во компанија што се занимава со онлајн трговија на мало, чие седиште е во Гуангжу, а препродава, односно соработува со трговци како „Амазон“ (Amazon.com Inc.), „Шејн“ (Shein Group Ltd.) и „Тему“ (Temu) на „ПДД холдингс“ (PDD Holdings Inc).

Иако американските купувачи лани сочинуваа 80 проценти од вкупната годишна продажба на неговата компанија, фирмата на Хуанг првично се обиде да ја намали таа зависност од САД на само 20 проценти преку раст на други пазари. Неочекуваниот пораст на продажбата пред воведувањето на царините ја поништи таа цел оваа година, но „оддалечувањето од САД е единствениот начин да се намалат трговските ризици на долг рок“, рече тој.

Кинескиот претседател Шји Џјинпинг и американскиот претседател Доналд Трамп најавија попуштање на трговските тензии по нивната долгоочекувана средба во Јужна Кореја. Доколку царината од 20 проценти за фентанилот се преполови, како што објави Трамп по средбата, тогаш просечната стапка за кинеските стоки ќе падне на 31 отсто според „Блумберг економикс“. Тоа е далеку под американските царини од 50 проценти за многу производи од Бразил и од Индија - што го прави производството во Кина попривлечно од овие две, барем засега, особено откако ќе се земат предвид нејзиниот зрел производствен екосистем и огромниот број обучени работници.
Неколку кинески извозници со кои разговараше „Блумберг њуз“ се оптимисти дека подобрените трговски односи ќе резултираат со зголемување на протокот на нарачки меѓу најголемите економии во светот, зајакнувајќи ја профитабилноста за бизнисите што во последните месеци беа притиснати од американските царини од повеќе од 50 проценти за увоз од Кина.

„Ќе добиеме подобри зделки со американските клиенти“, рече Андре Хуанг, менаџер за продажба, кој работи за фирма во источна Кина што продава производи за чистење на домаќинствата.

Експанзијата на компанијата во САД запре поради претходно наметнатите високи царини, но Хуанг забележа дека во последно време работите почнале да се подобруваат поради растечките очекувања за конечна средба на Трамп и Шји со позитивен исход. Тој рече дека повеќе американски клиенти се појавиле на трговскиот саем што моментално се одржува во Гуангжу отколку на сличен настан што се одржал пред само неколку месеци.

Научени лекции

Сепак, изгледите за поголем бизнис во САД веќе не ги возбудуваат кинеските извозници како некогаш. Многумина рекоа дека ги научиле лекциите од трговското ризично однесување на Трамп и сега сфаќаат дека не можат да се потпрат само на пристап до најголемиот потрошувачки пазар во светот.

Пробивот кон пазарите надвор од САД веќе е видлив во трговските податоци на Кина. Земјата е на добар пат за рекорден трговски суфицит од 1,2 билион долари оваа година бидејќи испораките во Европа, Африка и други делови од Азија го компензираат падот на извозот во САД.

Истовремено, многу купувачи во САД почнаа да ја преиспитуваат својата зависност од стратегијата за снабдување од Кина. Тие бараат од доставувачите да воспостават производствени операции надвор од Кина, дури и ако тоа значи повисоки трошоци и пониска ефикасност во блиска иднина.

За Лин Киан, кој раководи со фабрики за производство на играчки и во јужнокинескиот град Шенжен и во Виетнам, пониските американски даноци значат дека неговите кинески фабрики ќе продолжат да обработуваат најголем дел од нарачките од американски клиенти во блиска иднина. Но, на долг рок, тој гледа оддалечување на бизнисот од Кина со цел да избегне натамошни нарушувања.

„И ние и нашите клиенти сме сигурни дека темпото на диверзификација нема да се промени бидејќи односите меѓу Кина и САД сè уште се нестабилни“, рече тој.

Отворањето производствен погон во блискиот Виетнам не е предмет на преговори за компанија што три четвртини од своите приходи остварува од американските брендови на играчки. Овие клиенти, кои Лин не сакаше да ги прецизира, претходно се заканија дека ќе престанат да нарачуваат ако не го премести поголемиот дел од производството во земјата од Југоисточна Азија.

Производството во фабриката за играчки на Лин во Виетнам конечно започна во септември, три месеци подоцна од очекуваното. „Предизвиците се очигледни“, рече тој, додавајќи дека „навистина мора да ја напуштиме нашата зона на удобност“.

Поседувањето фабрики и дома и во странство им обезбеди поголемо чувство на сигурност на многу извозници со седиште во Кина.

„Веќе не се плашиме од подеми и падови на царинските стапки“, рече Бери Шан, чија компанија моментално произведува празнични украси за „Волмарт“ (Walmart Inc.) во својата фабрика во источната кинеска покраина Џеџијанг. Тој наскоро ќе го прави тоа во нов погон во Камбоџа.

Дури и за кинеските извозници што сè уште сакаат да ги задржат САД како свој примарен пазар, диверзификацијата на производството надвор од Кина се смета за суштинска за да останат конкурентни.

„Сите се диверзифицираат“, рече шпедитерот со седиште во Шангај, Кевен Чен. „Сега индустријата е согласна дека американскиот пазар не може да се потпре само на кинескиот синџир на снабдување, додека кинеските производители не можат да сметаат единствено на американскиот пазар“.