Во два блока продадени над 10.000 акции од Стопанска банка Битола за 435.000 евра

Во две блок трансакции со вкупна вредност од 26,7 милиони денари (435.000 евра) денеска на Македонската берза беа продадени 10.291 акција од „Стопанска банка“ АД Битола.

Во првата блок трансакција вредна 18,2 милиони денари(295.000 евра) беа продадени 7.001 акција односно 1,79 проценти од основната главнина, а во втората блок трансакција вредна 8,5 милиони денари (139.000 евра) беа продадени 3.290 акции, кои претставуваат 0,84 проценти од основната главнина.

Во двата блока акциите беа продадени по цена од 2.600 денари за акција, што е под номиналната вредност на акцијата на „Стопанска банка“ АД Битола која изнесува 3.000 денари.

Двете блок трансакции доаѓаат еден ден откако беше обелоденето дека се разгледува можноста за присоединување на „Стопанска банка“ АД Битола кон „Комерцијална банка“ АД Скопје.

„Блумберг Адрија“ вчера објави дека раководствата на двете банки ќе остварат контакт за првична размена на информации околу можноста за присоединување.

„Во оваа рана фаза постапката не претставува намера за присоединување и во ниту еден аспект нема обврзувачки карактер, освен да го изрази првичниот интерес во рамки на претходна постапка да се стекнат информации, врз основа на кои би се дефинирала евентуална намера за присоединување во иднина“, се вели во соопштението на двете банки.

Во него се додава дека вистинската длабинска анализа ќе биде спроведена после усвојувањето на завршните сметки за 2023 година на двете банки на нивните собранија во 2024 година.

„Поради тоа, ова известување не треба да се толкува како официјална намера за присоединување на „Стопанска банка“ АД Битола кон „Комерцијална банка“ АД Скопје“, соопштија од банките.

Во моментов нема коментари за веста. Биди прв да коментира...

Остави коментар