.webp){kind=icon}
Комерцијална банка во периодот јануари-септември годинава оствари добивка во износ од околу три милијарди денари (49,5 милиони евра), што е зголемување за 64,7 проценти во однос на истиот период минатата година кога добивката на банката изнесувала 1,85 милијарди денари (околу 30 милиони евра), покажува неконсолидираниот и неревидиран биланс на успех на банката објавен преку Македонската берза.
„Планираната бруто-добивка за трите квартали од 2023 година е остварена со 133,2 проценти. Притоа, остварената добивка пред исправка на вредност, која претставува показател за оперативната способност на банката да ги покрива расходите од работењето, е за 49,5 проценти поголема во однос на истиот период минатата година“, соопшти банката.
Од банката додаваат дека зголемувањето на добивката пред исправка на вредност главно произлегува од зголемените приходи од редовно работење, односно од нето-приходите од камати кои бележат значително зголемување што се должи на континуираниот пораст на основната каматна стапка на Народната банка и на каматните стапки на странските финансиски пазари, во комбинација со структурата на активата на банката.
Прочитај повеќе
Ретка можност за „брак“ меѓу македонски банки, колку кеш ќе чини?
„Комерцијална банка“ подолго време е гладна за раст. Прашање е дали по „утката“ со „Еуростандард банка“, ќе ја земе „Стопанска банка“ АД Битола?
02.10.2023
Во два блока продадени над 10.000 акции од Стопанска банка Битола за 435.000 евра
Во двата блока акциите беа продадени по цена од 2.600 денари за акција, што е под номиналната вредност на акцијата на „Стопанска банка“ АД Битола која изнесува 3.000 денари.
27.09.2023
Можно присоединување на Стопанска банка Битола кон Комерцијална банка
Во оваа рана фаза постапката не претставува намера за присоединување и во ниту еден аспект нема обврзувачки карактер
26.09.2023
Приходите од камати ја вивнаа добивката на Комерцијална банка
Приходите од камата оваа година се зголемиле за 82,1 проценти во однос на истиот период од минатата година.
28.07.2023
„Зголемувањето на каматните стапки е резултат на напорите за намалување на инфлацијата на светско ниво. Позитивниот резултат од работењето банката го оствари во услови на зголемена неизвесност поврзана со случувањата на меѓународните финансиски пазари, сѐ уште висока инфлација која бележи одредено забавување, како и натамошно затегнување на монетарната политика“, велат од банката.
Вкупните приходи од работењето на Комерцијална банка во овој период изнесуваат 5,1 милијарда денари (83 милиони евра) и бележат зголемување од 31,6 проценти во однос на истиот период од минатата година.
„Нето-приходите од камата претставуваат основна компонента во формирањето на вкупните приходи од работењето и на 30.09.2023 година истите бележат зголемување од 80,7 проценти во однос на истиот период од минатата година. Притоа треба да се укаже дека иако пораст бележат сите категории каматни приходи, најголемо влијание има порастот на каматата од финансиски друштва, а во помал обем влијае и порастот на приходите од камати од нефинансиски друштва, нерезиденти и држава“, велат од банката.
Од Комерцијална банка како пример го посочуваат зголемувањето на каматните приходи остварени од финансиските друштва, каде доминираат пласманите во благајнички записи и депозитите во НБРСМ и кои се деветкратно поголеми, а кај нерезидентите, каде преовладуваат пласманите во странски банки приходите се петкратно поголеми од остварените во истиот период минатата година.
„Во текот на минатата година започна циклус на затегнување на монетарната политика преку зголемување на каматните стапки, како во ЕУ и САД, така и кај нас. Така, каматната стапка Еурибор, која во третиот квартал од 2022 година се движеше од минимално под нула до околу два проценти кај 12-месечниот Еурибор, оваа година достигна околу 3,5 – 4 проценти. Кај благајничките записи, каматната стапка започна да се зголемува во април 2022 година и на 30.09.2022 година изнесуваше три проценти додека на 30.09.2023 година истата достигна 6,30 проценти“, велат од банката.
Оттаму посочуваат дека истовремено, Народната банка ги зголемувала каматните стапки на депозитите пласирани преку ноќ и до 7 дена и дека имало зголемување кај каматите на државите записи.
„Токму затоа, во билансот на банката, приходите од камати кај финансиските друштва и нерезидентите збирно, се значително поголеми од приходите од каматите кај населението. Исто така, збирните приходи од каматите кај финансиските друштва, нерезидентите и државата се поголеми од приходите од камати кај правните лица“, велат од банката.
Според нив, банката ги остварила овие резултати благодарение на структурата на активата, во која над 56 проценти од пласманите се во парични средства, парични еквиваленти и пласмани во хартии од вредност, што влијаело на одржување на висока ликвидност и профитабилност од каматни приходи.
„Како резултат на ваквите движења, нето-каматната маржа на ниво на банката се зголеми од 2,10 проценти заклучно со крајот на третиот квартал од минатата година, на 3,56 проценти со 30.09.2023 година“, велат од банката.
Од КБ потенцираат дека минимално зголемување од 2,4 проценти има и кај нето приходите од провизии и надоместоци и зголемување од 19,6 проценти кај нето-приходите од курсни разлики.
