.webp){kind=icon}
Над 70 милиони евра се вкупните приходи од работењето на НЛБ банка во деветте месеци годинава. Банката денеска ги објави финансиските показатели за тој период. Според нив, вкупните приходи пораснале за 16,7 отсто во однос на истиот период лани. Во тоа време НЛБ банка успеала да го зголеми профитот за 19,1 проценти, до 39,6 милиони евра.
Од банката велат дека станува збор за успешен период во кој им обезбедиле силна кредитна поддршка на населението и на бизнисот, зголемувајќи го притоа пласманот на кредитите кон небанкарскиот сектор и обезбедувајќи раст од 6,2 отсто во овој сегмент споредено со истиот период минатата година.
Најголем раст на приходите има кај тие од камати што имаат годишен раст за периодот од над 26 отсто, што се должи на раст на портфолиото во секторот домаќинства, како и пораст на референтните стапки, додека расходите за камати се повисоки за 48 отсто главно поради порастот на каматните стапки по основа на субординирани обврски, кредитни линии и депозити.
Нето-приходите од провизии се повисоки за 7,4 отсто споредено со претходната година, при што приходите од провизии се зголемени за 6,2 отсто, како резултат на зголемени приходи од реализирани трансакции со картички и картично порамнување, повисоки приходи од услуги во платен промет во земјата и во странство и повисоки приходи од работење со трансакциски сметки.
Вкупните оперативни трошоци изнесуваат 30,6 милиони евра и се зголемени за 10,9 отсто, при што трошоците за вработени се повисоки за 20,1 проценти, трошоците за амортизација се пониски за 0,7 отсто, а преостанатите расходи од дејноста се повисоки за 5,2 проценти во однос на истиот период претходната година.
Од НЛБ соопштуваат дека бележат раст и на довербата на депонентите, што резултирало со зголемување на вкупните депозити за 2,9 отсто споредено со истиот период лани.
„НЛБ банка и понатаму дејствува во насока на поддршка на приватниот сектор во земјата, со што има значаен придонес во макроекономскиот и финансискиот амбиент на државата. Банката во континуитет обезбедува поддршка на стопанството преку проширување на понудата за стартап-компаниите, учество во раните фази од процесот на создавање на стартап-компаниите, како и нивна дигитализација. Дополнително, препознавајќи ги ризиците од климатските промени, банката зазеде проактивен став преку дадениот акцент на „зелените кредити“ – кредитирање во области за производство на електрична енергија од обновливи извори, намалување на загадувањето и подобрување на животната средина, се наведува во очекувањата за следниот период.
