„Oпен еј-ај“ напорно работи да ги смири скараните страни во компанијата

Претставничка на компанијата „Опен еј-ај“ (OpenAI), Ана Маканџу, која ја врши функцијата потпретседателка за глобални прашања, во порака до вработените наведува дека компанијата „напорно работи“ за да го обедини кадарот што влезе во конфликт. Тоа е напишано во примерок од белешката од претставничката, во која „Блумберг“ имал увид.

Пораката доаѓа по неколкудневни значајни преговори за тоа кој ќе биде на чело на компанијата и закани од речиси целиот персонал дека ќе ја напушти компанијата доколку одборот на директори не го врати поранешниот извршен директор Сем Алтман.

„Ве уверуваме дека нашата главна цел е повторно обединување на 'Опен еј-ај' и преговорите се во тек“, посочува Маканџу. Таа исто така нагласува дека компанијата е во контакт со Алтман, новиот извршен директор Емет Шир и одборот на директори, но дека засега тие „не се подготвени да дадат конечен одговор“.

Преговорите ќе продолжат денеска, кога „сите ќе преспијат малку“, напиша таа. На крајот таа завршува со охрабрувачка порака за вработените: „Знајте дека имаме план на кој работиме да го реализираме“.