.webp){kind=icon}
Пет хрватски и по една српска и бугарска компанија се најдоа на листата на топ 50 (Fast 50 CE) најбрзорастечки технолошки компании што секоја година ја составува „Дилоит“. И овој пат нема македонски претставник меѓу најдобрите, а најмногу брзорастечки компании има од Полска и од Чешка, по 18, додека од Словачка има четири, а од Романија три компании. Сепак една македонска софтверска компанија е спомената во извештајот, во кој освен брзорастечките, се креираат и дополнителни листи. Домашната „Хојо тек“ (Hoyo Tech) е меѓу избраните во категоријата влијателни ѕвезди (Impact Stars), која е посебна класификација на субјектите што успешно ги поврзале своите производи или услуги со влијание барем во една од следните категории - општество, бизнис, иновативност, животна средина или различност.
За да се најде на листата 50 најбрзорастечки, компанијата треба да има оперативни приходи од најмалку 50.000 евра во 2019, 2020, 2021 година и приход од 100.000 евра во 2022 година. Фирмата треба да поседува сопствена интелектуална сопственост или комерцијална технологија, продадена на клиенти во производи што придонесуваат
на мнозинството од компанијата. Седиштето на фирмата треба да е во Централна Европа, односно во Албанија, Бугарија, Босна и Херцеговина, Хрватска, Чешка, Естонија, Унгарија, Косово, Латвија, Литванија, Северна Македонија, Молдавија, Црна Гора, Полска, Романија, Србија, Словачка или во Словенија.
Од Србија на листата се најде „Фектори ворлд вајд“ (Factory World Wide), која е на 17-то место, а освен петте хрватски компании, кои се на главната листа, од оваа земја има уште четири компании на некоја од дополнителните листи.
„Станува збор за компании што имаат напредок без преседан, воведувале иновации како вештачката интелигенција и проширената реалност, мобилни мрежи и стакло со екран на допир, е-читачи, самостојно возење
и електрични автомобили, 3Д-печатење, НФТ, блокчејн, неверојатни решенија за е-трговија и многу повеќе производи за секојдневна употреба“, вели Јири Сауер од „Дилоит“.
Македонија нема свој претставник ниту на листата на компании за набљудување што имаат потенцијал за раст, но сепак на таа кај влијателните ѕвезди успеа да влезе „Хојо тек“. Компанијата е основана во август 2018 година, а главно работи на создавање целосен софтверски екосистем за кое било решение на IoT, дејствувајќи како давател на услуги со една точка за контакт.
„Во голем дел од нашиот регион има прогресивни и инспиративни компании што трпеливо работат на позитивно влијание за денеска и утре, создаваат практични и влијателни одговори на некои од брзите предизвици со кои се соочуваме. Во оваа категорија има 38 брилијантни млади компании од 15 земји што се наши влијателни ѕвезди за 2023 година“, изјави Ивана Лоренцовичева, партнерка за изработка на листата.
