Марк Закерберг продава акции на „Мета“ (Meta Platforms Inc.) за првпат по две години, откако гигантот за социјалните мрежи брзо си дојде на себе по бурната 2022 година.
Фондот на коосновачот на „Мета“ и субјекти за добротворно и политичко дарување ослободиле околу 682.000 акции во вредност од речиси 185 милиони долари во ноември преку плановите за тргување, а најновите биле во средата, според податоци собрани од „Блумберг“, од регулаторните документи. Тоа е првпат ентитети што управуваат со богатството на Закерберг да продаваат акции по ноември 2021 година.
„Мета“ годинава забележа раст за 172 отсто до крајот на ноември, надминувајќи ги сите големи американски технолошки компании, освен „Енвидија“ (Nvidia Corp). Тоа помага да се максимизираат приходите за активностите на Закерберг надвор од „Мета“, кои вклучуваат ризичен капитал и научни истражувања.
Скок на акциите на „Мета“
Bloomberg
Тој редовно пушташе блокови на акции од „Мета“ во изминатата деценија, но не продаде ниту една акција во 2022 година, кога катастрофалните квартални резултати доведоа до една од најголемите еднодневни загуби на акциите и најлошо годишно работење на „Мета“ од нејзината иницијална јавна понуда во 2012 година.
Акциите на „Мета“ сега се приближуваат до рекордите поставени во 2021 година, кога Закерберг и неговата добротворна фондација „Чен Закерберг“ (Chan Zuckerberg Initiative) продадоа повеќе од милијарда долари во акции на компанијата од Менло Парк, Калифорнија. Триесет и деветгодишникот сè уште има околу 13 отсто од „Мета“, што го сочинува речиси целото негово богатство од 117,7 милијарди долари, според индексот на милијардери на „Блумберг“.
Закерберг и неговата сопруга Присила Чен (38) претходно ветија дека во текот на животот ќе одвојат 99 отсто од своето богатство за филантропски цели, како што се промовирање еднаквост и лекување болести. Повеќе од половина од неодамнешната продажба на акции на „Мета“ доаѓа од удел контролиран од нивната истоимена фондација.
Најмалиот дел од распродажбата - околу 19 милиони долари - отиде во одделот за застапување на иницијативата „Чен Закерберг“. Организацијата финансира напори за мобилизирање на гласачите, како и за унапредување на реформите за имиграцијата.
Во текот на годинава иницијативата „Чен Закерберг“ вети 250 милиони долари за основање центар за биомедицински истражувања во Чикаго. Таа ги поддржа и напорите за справување со недостигот од станови во областа на заливот Сан Франциско и направи инвестиции во рана фаза за обука на програмери во Африка.
Основана во 2015 година, фондацијата со седиште во Пало Алто, Калифорнија, има нето-имот од околу 6,3 милијарди долари и е предводена од Закерберг и Чен, покажуваат најновите поднесоци. Акциите на „Мета“ се зголемија за повеќе од 200 отсто откако тие пред осум години ветија дека ќе го донираат најголемиот дел од своето богатство.
.webp){kind=icon}
Во моментов нема коментари за веста. Биди прв да коментира...