.webp){kind=icon}
„Ербас“ (Airbus) треба да испорача 97 авиони во декември за да ја исполни целта од 720 авиони за 2023 година, соопшти главниот извршен директор Гијом Фори. Производителот на авиони испорача 64 летала во ноември, со што вкупниот број на испораки во 11-те месеци од оваа година се искачи на 623, велат извори на „Блумберг“.
Производството во „Ербас“ вообичаено значително се зголемува во декември со цел европскиот производител на авиони да ги исполни годишните цели. Компанијата, исто така, ги завршува последните работи на авионите кои се главно склопени и чекаат делови, што помага да се зголеми бројот на испораки во последниот месец. Во декември 2022 година, „Ербас“ испорача 98 авиони, а редовно испорачуваше повеќе од 100 на крајот на годината пред пандемијата Ковид-19 да ги прекине синџирите на снабдување.
Минатиот месец Фори посочи дека „Ербас“ ќе може да ја исполни својата цел до крајот на годината.
Производителите на авиони се обидуваат да најдат рамнотежа помеѓу клиентите кои купуваат авиони во рекорден број и добавувачите кои се борат да бидат во чекор со побрзото темпо на производство. Како „Ербас“, така и конкурентот „Боинг“ (Boeing Co.) наиде на тешкотии со грешки во производството од некои компании кои снабдуваат делови.
