text size
Извршниот директор на „Опен еј-ај“ (OpenAI), Сем Алтман, е еден од најголемите сопственици на Редит (Reddit Inc.), според регулаторните документи во кои се наведени плановите на социјалната мрежа за иницијална јавна понуда (ИПО). Во четвртокот Редит поднесе барање до Комисијата за хартии од вредност на САД за котација на Њујоршката берза, која треба да биде едно од најголемите котирања годинава.
Субјектите поврзани со Алтман имаат 8,7 отсто од акциите во Редит, се наведува во поднесокот објавен неделава. Ова вклучува 789.456 акции од класата А и 11,4 милиони акции од класата Б. Најголем сопственик на Редит е „Адвенс магазин“ (Advance Magazine Publishers Inc.) - дел од издавачката империја на семејството Њухаус - со околу една третина од гласачката моќ.
Алтман одржува долгогодишна врска со Редит, чие седиште е во Сан Франциско. Алтман и соосновачите на Редит, Стив Хафман и Алексис Оханијан, беа дел од првата класа учесници во акцелераторот „Ипсилон комбинатор“ (Y Combinator) во 2005 година. Алтман дури накратко беше привремен извршен директор на компанијата откако поранешниот извршен директор Јишан Вонг поднесе оставка.
Прочитај повеќе
„Редит“ предводник на групата на потенцијални кандидати за ИПО во 2024 година
„Редит“ повторно е во преговори со потенцијални инвеститори за иницијалната јавна понуда (анг. IPO) на компанијата за социјално вмрежување.
28.11.2023
„Иако моите осум дена како извршен директор на Редит беа забавни, среќен сум што се ближат до крајот“, напиша тој тогаш, најавувајќи го ангажирањето на привремената извршна директорка Елен Пао.
Во својот поднесок во четвртокот, Редит соопшти дека планира делумно да го развие својот бизнис преку договори за лиценцирање податоци со компании за вештачка интелигенција (ВИ), покрај тоа што ќе работи на сопствени производи поврзани со ВИ. Овие договори за лиценцирање ќе ѝ овозможат на компанијата да го искористи своето богатство на содржини како поголем генератор на приходи. Во четвртокот Редит објави договор со Гугл на „Алфабет“ (Alphabet Inc.), кој вклучува обука за вештачка интелигенција, но не објави партнерство со „Опен еј-ај“ на Алтман.
„Огромната и неспоредлива архива на Редит со вистински, навремени и релевантни разговори буквално на секоја тема е непроценлива база на податоци за различни цели, вклучувајќи пребарување, обука и истражување за вештачка интелигенција“, напиша соосновачот на Редит и актуелен извршен директор Хафман во писмо во прилог на поднесокот.
.webp){kind=icon}
