text size
Американската комисија за хартии од вредност и берзи истражува дали инвеститорите на „Опен еј-ај“ биле доведени во заблуда додека стартапот минувал низ жестока дебата за управување минатата година, објави „Волстрит журнал“, цитирајќи луѓе запознаени со истрагата.
Регулаторот ги разгледува внатрешните комуникации на извршниот директор Сем Алтман во врска со неговото заминување во ноември, според извештајот. Комисијата ја повика компанијата во декември и побара од високите претставници на „Опен еј-ај“ да ги зачуваат внатрешните документи, велат изворите.
За да си ја врати работата, Алтман, меѓу другите услови, се согласил и на внатрешна истрага. Ненадејното отпуштање и изјавата на одборот, во која се истакнува дека Алтман не бил „постојано искрен во комуникацијата“, всадија сомнеж. Сепак, ништо не излезе на виделина, иако беа откриени тензии во „Опен еј-ај“ околу собирањето пари за потфатот со чипови, вклучувајќи го и барањето за финансирање на Блискиот Исток. Има спор и со поранешната членка на одборот Хелен Тонер за истражувачки труд што таа помогнала да се напише, а кој бил критички настроен кон компанијата.
Bloomberg
„Тоа беше моделот на однесување на Алтман - не само една сомнителна акција - што предизвика одборот да ја изгуби довербата во него“, тврди лице што директно ги знае случувањата во одборот, кое побара да остане анонимно.
ЧетГПТ на „Опен еј-ај“ ја започна тековната трка за усвојување на вештачката интелигенција низ индустриите и услужните сектори, при што „Мајкрософт“ инвестира повеќе од 10 милијарди долари во партнерството со овој стартап.
Истрагата на комисијата не може да доведе до откривање погрешни постапки од страна на инволвираните страни. „Опен еј-ај“ избра двајца адвокати од фирмата „Вилмерхал“ (WilmerHale) да спроведат истрага за настаните.
„Додека прегледот е во тек, одборот ќе продолжи да презема чекори за зајакнување на корпоративното управување на ’Опен еј-ај’ да создаде квалификуван и разновиден одбор од исклучителни поединци и да ја надгледува важната мисија на ’Опен-еј-ај’ да се осигури дека општата вештачка интелигенција ќе има корист за целото човештво“, вели Брет Тејлор, претседател на одборот на „Опен еј-ај“.
.webp){kind=icon}
