„Нетфликс“ доби нови 9,33 милиони корисници за три месеци

Стриминг-платформата „Нетфликс“ (Netflix Inc.) објави дека имала најдобар почеток на годината од 2020-та наваму, привлекувајќи повеќе нови клиенти отколку што очекуваше кој било, благодарение на силната листа на оригинални програми и репресијата за споделување на лозинките меѓу корисниците.

Компанијата додаде 9,33 милиони клиенти во првиот квартал од 2024 година, што е речиси двојно зголемување на просекот од 4,84 милиони што го проценија аналитичарите. „Нетфликс“ привлече нови клиенти од целиот свет, покажувајќи особена сила во САД и Канада. Тие нови претплатници ѝ помогнаа на компанијата да ги надмине прогнозите за продажба и заработка.

И покрај растот, акциите на „Нетфликс“ паднаа за 4,6 отсто, до 582,70 долари, во 18.03 часот во Њујорк. Тие беа зголемени за 25 отсто годинава до затворањето на редовното тргување во четвртокот.

Очекувањата за првиот квартал на „Нетфликс“ се зголемија во последните денови, бидејќи аналитичарите еден по друг објавуваа розови прогнози. Во своето писмо до инвеститорите во четвртокот компанијата посочи дека добивките од претплатниците ќе бидат помали во овој период, додека приходите ќе се зголемат за 16 отсто.

„Нетфликс“ исто така соопшти дека ќе престане да известува за кварталните бројки на членовите и приходите по претплатник, почнувајќи од првиот квартал на 2025 година. Тие метрики долго време беа основниот начин на кој Волстрит ги оценуваше перформансите на компанијата, но „Нетфликс“ се обиде да го префрли фокусот кон традиционалните мерки како продажба и профит. Раководството ќе продолжи да известува за главните пресвртници во однос на претплатите.

„Потегот од следната година повеќе да не се откриваат кварталните претплати нема да биде на добро“, посочи во е-пошта Паоло Пескаторе, основач и аналитичар во „ПП Форсајт“ (PP Foresight). „Ова е особено точно ако го погледнеме растот на претплатниците што го имаше стриминг-платформата во претходната година“, додаде тој.

„Нетфликс“ се врати од забавувањето во 2021 и 2022 година и порасна со најбрза стапка од раните денови на пандемијата на коронавирусот. Тоа во голема мера се должи на спроведената репресија врз луѓето што користеле туѓ налог за да гледаат серии. Компанијата процени дека повеќе од 100 милиони луѓе користеле сметка за која не платиле. Иако директорите на „Нетфликс“ се плашеа од реакцијата на клиентите, компанијата успеа да убеди милиони луѓе да платат за пристап.

Новите клиенти имаат многу за гледање. „Нетфликс“ испорачува нов хит на секои неколку недели досега годинава, вклучувајќи ограничени серии, како што се „Fool Me Once“ и „Griselda“, драмите „The Gentleman“ и „3 Body Problem“ и реалното шоу „Love Is Blind“. Услугата за стриминг сочинува околу 8 отсто од гледањето ТВ во САД - и е водечка ТВ-мрежа на повеќето од главните светски медиумски пазари.

„Со повеќе од две лица по домаќинство во просек, имаме публика од над половина милијарда луѓе“, се наведува во соопштението компанијата. „Ниту една компанија за забава досега немала ваков обем и амбиција“.

Во моментов нема коментари за веста. Биди прв да коментира...

Остави коментар