.webp){kind=icon}
„Епл“ (Apple Inc.) го претстави новиот ајпад про (iPad Pro), фокусиран на вештачка интелигенција, како и поголемиот ајпад ер (iPad Air), со цел да се освежи линијата на таблети, која стагнираше во последните две години.
На онлајн настанот „Лет лус“ (Let Loose) во вторникот компанијата ја претстави првата редизајнирана верзија на ајпад про од 2018 година. Новиот модел е потенок, вклучува поостар дисплеј ултраретина ХДР (Ultra Retina XDR) со технологија ОЛЕД (OLED) и има побрз чип M4, кој може да се справи со задачите со вештачка интелигенција. Новиот ајпад ер (iPad Air) изгледа како претходната верзија, но има опција со поголем екран и процесор M2.
Новиот 13-инчен ајпад про е дебел само 5,1 милиметри, велат од компанијата, со што е најтенок производ на „Епл“ досега. Поголемата верзија е за петтина од килограм полесна од својот претходник, додека 11-инчниот модел тежи помалку од половина килограм.
Лансирањето ѝ стави крај на најдолгата суша на „Епл“ во однос на нови изданија на ајпад откако соосновачот Стив Џобс првпат го претстави уредот во 2010 година. Линијата претходно беше ажурирана во октомври 2022 година, кога „Епл“ вгради побрз чип на ајпад про и претстави редизајниран поевтин модел.
„Епл“ сака да го извлече ајпад од сериозен пад. Продажбата на уредот беше особено слаба во минатиот квартал, кога падна за 17 отсто и беше под процените на аналитичарите, но „Епл“ предвиде дека приходите од ајпад ќе се вратат во тековниот период.
Објавата од вторникот малку ги возбуди инвеститорите. Ова е чест случај со настаните на „Епл“, бидејќи за повеќето клучни детали се известува однапред.
Акциите беа малку променети на 181,90 долар во Њујорк, што одразува пад од околу шест проценти од година на година. Чипот M4, кој го заменува M2 во ајпад про, е најновото дополнување на линијата домашни процесори на „Епл“. Централната процесорска единица е 50 проценти побрза од онаа во актуелниот ајпад про, а графичкиот мотор е четири пати побрз. Чипот е направен со технологија од 3 нанометри од втората генерација, соопшти „Епл“.
Bloomberg
Главното подобрување е таканаречениот невронски мотор, за кој компанијата вели дека е 60 пати побрз од нејзиниот оригинален невронски мотор од 2017 година. Ова ќе му помогне на ајпад про да се справи со задачите поврзани со вештачка интелигенција на самиот уред.
„Епл“ планира дополнително да разговара за своите планови за вештачка интелигенција на 10 јуни, на својата светска конференција за програмери.
ОЛЕД-екранот на ајпад про - скратеница за органски диоди што емитуваат светлина - значи дека боите се репродуцираат попрецизно и изгледаат поостро. Тоа е истата основна технологија на екранот што се користи во ајфон (iPhone) и епл воч (Apple Watch), но во поголем обем. „Епл“ покажа како дисплејот може да биде значително посветол од претходните екрани на ајпад и да ја подобри содржината со висок динамички опсег.
За првпат „Епл“ нуди опција за матирана текстура на екран за корисниците на моделите про. Претходните верзии на ајпад про користеа екрани мини ЛЕД (Mini LED), технологија што создаде „блум“ ефект - светлина што продира за да може да ја замати сликата. Новите модели доаѓаат во „спејс блек“ и „силвер“ боја, соопшти компанијата.
Иако продажбата на ајпад уреди е ослабена во последните две години, ајпад сè уште е најпродаваниот таблет на глобално ниво. Според истражувачката компанија ИДЦ (IDC), речиси 10 милиони ајпади се продадени во првиот квартал, при што „Епл“ одржува пазарен удел од 32 процента. Сепак, продажбата на единици е намалена за девет отсто во споредба со минатата година.
„Самсунг“ (Samsung Electronics Co.) го зазеде второто место со удел од 22 процента, додека „Хуавеј“ (Huawei Technologies Co.), „Леново“ (Lenovo Group Ltd.) и „Шаоми“ (Xiaomi Corp.) се во првите пет по продажба.
Bloomberg
Покрај новиот хардвер, „Епл“ ги ажурираше фајнал кат про (Final Cut Pro) и лоџик про (Logic Pro) за ајпад и воведе нова апликација наречена фајнал кат камера (Final Cut Camera), која им дава на ајфоните и ајпадите дополнителни агли на камерата додека снимате видео. Двата нови модела, ајпад про и ајпад ер, имаат можност да ја поместат камерата на хоризонтална страна, што е одговор на компанијата на честите барања на корисниците.
„Епл“ се обидува да истисне повеќе приходи од својата линија на ајпади со лансирање два премиум додатока. Новата меџик киборд (Magic Keyboard) од 299 и 349 долари, која е футрола за ајпад со вградена подлога и тастатура, сега е направена од поиздржлив алуминиумски материјал и прави ајпадот да изгледа повеќе како лаптоп. Вториот додаток, новиот епл пенсил про (Apple Pencil Pro) од 129 долари обезбедува дополнителни опции за уметниците.
Компанијата не го ажурираше уредот ајпад мини (iPad mini), но планира да направи промени на тој производ веќе на крајот на годинава, како што објави „Блумберг њуз“ (Bloomberg News). Покрај подобрените спецификации, ајпад има и повисока цена. Моделот од 11 инчи сега започнува од 999 долари, во споредба со цената на претходниот модел од 799 долари. Моделот од 13 инчи чини 1.299 долари па нагоре, што е зголемување од почетната цена од 1.099 долари. Ова го прави овој ајпад најскапиот таблет од „Епл“ досега.
Bloomberg
Сите нови ајпади ќе бидат достапни во продажба следната недела и ќе може да се нарачаат од вторник. Компанијата исто така ја намали цената на десеттата генерација на ајпад на 349 долари и го прекина производството на моделот од деветтата генерација од 329 долари.
Чипот M2 во ажурираниот ајпад ер доаѓа и во моделите со 11 и 13 инчи. Тоа е надградба во однос на чипот М1 од 2022 година и го прави таблетот 50 отсто побрз, според „Епл“. Моделот од 11 инчи и натаму чини 599 долари, додека 13-инчниот модел е 799 долари - што го прави најевтиниот таблет на „Епл“ со екран со големина речиси на лаптоп.
„Епл“ соопшти дека одлучил да го лансира поголемиот ајпад ер откако открил дека околу половина од купувачите на ајпад про се одлучиле за поголемата верзија на тој модел. Новиот ајпад ер доаѓа во сина, бела (англ. starlight), сребрена и сива (англ. space gray) боја, соопшти компанијата.
Ајпад ер има двојно поголем простор за складирање, почнувајќи од 128 гигабајти. Понудата се проширува до еден терабајт. Ајпад про има најмалку 256 гигабајти простор за складирање и оди до два терабајта.
