Најголема промена во историјата на ајфоните: „Епл“ го претстави преклопливиот „дуо“

„Епл“ (Apple) го претстави својот смартфон на преклопување, ајфон дуо (iPhone Duo), во рамки на големиот настан што компанијата го одржа во средата, со што направи една од најголемите дизајнерски промени во речиси две децении историја на ајфоните. Компанијата се обложува дека новата категорија уреди ќе даде дополнителен поттик на растот на нејзината најпродавана линија.

Новиот уред, според новиот извршен директор на „Епл“, Џон Тернус, треба да понуди подобрено искуство во однос на преклопливите телефони на конкурентите, кои тој ги опиша како „два телефона незгодно залепени еден за друг“. Дуо се отвора хоризонтално и открива внатрешен екран од 7,6 инчи, односно околу 19,3 сантиметри, што е најголем екран досега вграден во ајфон. Кога уредот е преклопен, корисникот располага со надворешен екран од 5,4 инчи. 

„Епл“ го дизајнирал дуо така што да нуди поцврсто чувство при користење, со помалку изразен набор од преклопување во средината на екранот. Компанијата користи прилагодена шарка, а софтверскиот интерфејс е оптимизиран за новиот формат и овозможува двата екрана да функционираат поусогласено. Уредот е замислен да понуди искуство слично на ајпад, но во формат што може да се носи во џеб.

Дуо ќе биде позициониран на врвот на понудата на ајфон и ќе има почетна цена од 1.999 долари за моделот со 256 гигабајти меморија. Преднарачките започнуваат на 16 октомври во повеќе од 70 земји и региони, додека официјалната продажба започнува на 23 октомври. Најскапата верзија, со два терабајти простор за складирање, ќе чини 3.199 долари. 

Уредот поддржува и епл пенсил (Apple Pencil), односно моливот што досега главно се поврзуваше со ајпад, а оваа функционалност треба да стане достапна подоцна годинава. Дуо е опремен со A20 про чип и модем Ц2 (C2), а дизајнот вклучува титаниумско тело и механизам на шарка развиен специјално за преклопливиот формат.  

Внатрешниот екран е дизајниран да понуди поголем простор за мултитаскинг и користење на повеќе апликации, а уредот може да се користи и вертикално откако ќе биде отворен. „Епл“ дополнително го оптимизирал софтверот за новиот облик, со цел различните режими на користење да изгледаат што е можно поприродно.

Според „Епл“, дуо може да обезбеди до 31 час репродукција на видеа преку внатрешниот екран. Компанијата истовремено воведе и побрзо жично полнење кај новата про линија на ајфони, иако дуо има посебно наведена автономија.

Џон Тернус со новиот ајфон дуо Bloomberg

Преклопливиот ајфон претставува најголема промена во дизајнот на ајфоните во нивната речиси дведецениска историја. „Епл“ со тоа влегува на пазар што веќе со години го развива „Самсунг“ и други производители на смартфони, но компанијата се обидува да се разликува преку дизајнот, интеграцијата на хардверот и софтверот и својата системска предност. 

И покрај големото внимание кон новиот уред, реакцијата на инвеститорите беше воздржана. Акциите на „Епл“ во Њујорк беа речиси непроменети и тргувањето заврши на 315,34 долари.

Настанот беше особено значаен и поради тоа што беше прв голем настан за продукти на Џон Тернус како извршен директор. Тој ја презеде функцијата на 1 септември, додека долгогодишниот директор Тим Кук останува во „Епл“ како извршен претседател и присуствуваше на презентацијата.

Тернус на почетокот на настанот ја претстави и својата визија за уредите со вештачка интелигенција (ВИ), при што ајфон го опиша како „интелигентно лично јадро“. Според него, ајфон и понатаму ќе биде во центарот на светот на вештачката интелигенција благодарение на својот екран, сензори и процесори, како и можноста да функционира со останатите уреди на „Епл“.

Ајфон 18 про Bloomberg

Самите нови ајфон модели не носат целосно нова генерација на ВИ-функции, но „Епл“ ги поставува надградената Сири (Siri) и ЕИ (Apple Intelligence) како главен начин на интеракција со уредите. Компанијата воведува и функција која ќе може да потврди дали фотографија направена со ајфон била изменета со вештачка интелигенција.

Покрај дуо, „Епл“ ја претстави и новата про линија - ајфон 18 про и ајфон 18 про макс, двата со A20 чип и најдолга автономија на батеријата во историјата на ајфоните. Про макс нуди до 45 часа репродукција на видео, додека помалиот про модел нуди до 36 часа. „Епл“ овојпат не претстави нов основен ајфон 18, бидејќи компанијата го менува распоредот и тој модел треба да биде претставен напролет, заедно со ајфон 18е (iPhone 18e) и ајфон ер 2 (iPhone Air 2).

„Епл“ ги зголеми и цените на про моделите за 100 долари. Ајфон 18 про започнува од 1.199 долари, додека про макс чини 1.299 долари, при што двата модела започнуваат со 256 гигабајти простор. Преднарачките за нив почнуваат на 12 септември, а продажбата на 18 септември.

Компанијата ги претстави и ерподс 5 (AirPods 5) со подобрено активно задушување на бучавата и режим на транспарентност. Основниот модел чини 129 долари, додека верзијата од 149 долари нуди подолга автономија и можност за контролирање на јачината на звукот со лизгање нагоре и надолу по основата на слушалката.

„Епл“ ја освежи и линијата на паметни часовници со еполвоч 12 (Apple Watch Series 12) и еполвоч ултра 4 (Apple Watch Ultra 4). Новите модели користат помоќни S11 чипови и имаат проширени аудио-интелигентни функции. Меѓу нив е лајв ривајнд (Live Rewind), која овозможува враќање 15 секунди наназад за корисникот повторно да добие запис од она што штотуку било кажано, како и сири рикепс (Siri Recaps), функција која може да понуди резиме на разговорите на корисникот во текот на денот.