.webp){kind=icon}
Главниот научник и соосновач на „Опен-еј-ај“, Илја Сутскевер, ја напушта компанијата за вештачка интелигенција, заминување што им стави крај на повеќемесечните шпекулации во Силициумската Долина за иднината на врвниот истражувач на вештачката интелигенција, кој одигра клучна улога во краткото соборување на Сем Алтман минатата година.
Сутскевер ќе биде заменет со директорот за истражување Јакуб Пачоцки, објави „Опен-еј-ај“ на својот блог во вторникот.
Во објавата на X, Сутскевер ја нарече траекторијата на „Опен-еј-ај“ „чудесна“ и рече дека е уверен дека компанијата ќе изгради вештачка интелигенција што е „и безбедна и корисна“ под нејзиното сегашно раководство.
Речиси деценискиот мандат на Сутскевер во „Опен-еј-ај“ беше драматичен. Кога „Опен-еј-ај“ беше основан во 2015 година, тој служеше како нејзин директор за истражување откако беше регрутиран да ѝ се приклучи на компанијата од Илон Маск. Во тој момент Сутскевер веќе беше добропознат на теренот по неговото истражување на невронските мрежи на Универзитетот во Торонто и неговата работа во лабораторијата за мозокот на „Гугл“.
Како централна фигура во компанијата, Сутскевер дури и раководеше со свадбата на претседателот Грег Брокман во канцелариите на „Опен-еј-ај“.
Минатата година Сутскевер беше еден од неколкуте члена на одборот на „Опен-еј-ај“ што го отпуштија главниот извршен директор Алтман, одлука што предизвика виор пет дена во компанијата: Брокман поднесе оставка во знак на протест. Инвеститорите беа револтирани. И за неколку дена речиси сите околу 770 вработени на „Опен-еј-ај“ потпишаа писмо во кое се заканија дека ќе дадат отказ доколку Алтман не биде вратен на работа.
Дополнително на хаосот, Сутскевер рече дека жали за неговото учество во соборувањето на Алтман. Набрзо потоа, извршниот директор беше вратен на функцијата.
Откако Алтман се врати во компанијата кон крајот на ноември, тој во објава на блог наведе дека Сутскевер нема да се врати на својата поранешна функција како член на одборот, туку дека компанијата „дискутира како тој може да ја продолжи својата работа во ’Опен-еј-ај’“.
Во следните месеци Сутскевер во голема мера исчезна од очите на јавноста, што предизвика шпекулации за неговата континуирана улога во компанијата. Објавата на Сутскевер во вторникот на X беше првпат тој да сподели нешто на социјалната мрежа откако претходно објави порака од „Опен-еј-ај“ во декември.
Запрашан за Сутскевер на прес-конференција во март, Алтман рече дека го сака „Опен-еј-ај“ и дека верува дека и Сутскевер го сака, додавајќи: „Се надевам дека ќе работиме заедно до крајот на нашата кариера“.
Во објавата на X во вторникот, Алтман напиша: „Илја е еден од најголемите умови на нашата генерација, водилка во нашата област и драг пријател“.
Сутскевер објави на X дека работи на сè уште неименуван проект, кој „лично е многу значаен“ за него.
Новиот главен научник на компанијата, Пачоцки, работи во „Опен-еј-ај“ од 2017 година. Пачоцки го предводеше развојот на моделот ГПТ-4 на компанијата, наведе „Опен-еј-ај“.
