ГД „Гранит“ АД Скопје во периодот јануари-јуни 2022 година оствари добивка од 65 милиони денари, што е повеќекратно зголемување во однос на истиот период минатата година кога компанијата имала добивка од 3,2 милиони денари, покажува неревидираниот биланс на успех на компанијата објавен преку Македонската берза.
„Вкупната сеопфатна добивка изнесува 75.288.000 денари, и е поголема од добивката пред се поради останатата сеопфатна добивка во износ од 10.233.000 денари која произлегува како резултат на евидентирана нереализирана добивка од зголемување на пазарната вредност на портфолиото акции кои ги поседува друштвото во првата половина на 2022 година“, соопшти компанијата.
Остварените единечни вкупни приходи во периодот јануари-јуни 2022 година изнесуваат 1.933.343.000 денари и во споредба со остварените во истиот период 2021 година бележат намалување за 4 проценти.
Приходите од продажба изнесуваат 1.765.761.000 денари и во споредба со остварените во истиот период 2021 година бележат намалување за 8 проценти.
Финансиските приходи изнесуваат 73.569.000 денари и во споредба со остварените во истиот период 2021 година бележат зголемување за 1.405 проценти, пред се како резултат на наплатена дивиденда во текот на 2 квартал од 2022 за разлика од претходната година.
Пораст на трошоците
Остварените единечни вкупни расходи во периодот јануари-јуни 2022 година се во износ од 1.868.288.000 денари, споредено со истиот период 2021 година бележат намалување за 4 проценти.
„Во рамките на оперативните расходи, трошоците за материјали и суровини бележат зголемување за 12 проценти во однос на минатата година, пред се како резултат на зголемување на пазарните цени на одредени клучни материјали и соровини за изградба (нафта, цемент, железо, електрична енергија и др)“, информираат од компанијата.Трошоците за вработени се зголемени за 2 проценти во однос на минатата година, додека останатите трошоци од работењето се намалени за 33 проценти. Трошоците за услуги се намалени во однос на претходната година за 15 проценти.
Вкупната актива на друштвото на 30.06.2022 година изнесува 8.278.019.000 денари и во споредба со остварената во однос на декември 2021 година е повисока за 2 проценти.
Постојаните средства на друштвото на 30.06.2022 година изнесуваат 3.868.844.000 денари и во споредба со декември 2021 година се речиси на исто ниво како минатата година. Тековните средства на друштвото на 30.06.2022 година изнесуваат 4.409.175.000 денари и во споредба со декември 2021 година се повисоки за 5 проценти. Тековните обврски на друштвото на 30.06.2022 година изнесуваат 2.488.657.000 денари и во споредба со декември 2021 година се повисоки за 10 проценти. Долгорочните обврски на друштвото на 30.06.2022 година изнесуваат 73.764.000 денари и во споредба со декември 2021 година се намалени 9 проценти поради нивна отплата. Вкупните инвестиции во основни средства во периодот јануари-јуни 2022 година изнесуваат 113.918.000 денари, од кои најголем дел или 105.425.000 енари се во опрема и механизација.
Очекувања во престојниот период
Постоечката криза во Украина со Русија и енергетска криза со значајното зголемување на цените на главните енергенси и материјали (струја, гас, нафта, железо) имаат и сеуште ќе имаат влијание врз светската економија, а следствено на тоа и врз македонската економија во наредниот период, велат од „Гранит“.
„Влијанијата ќе имаат ефект посебно врз зголемување на цените на одредени суровини и материјали, енергија а преку тоа и врз крајните цени на многу производи. Друштвото континуирано ги следи движењата во националната, регионалната и глобалната економија со цел да се добијат информации за полесно одлучување.
Секторот градежништво продолжи да функционира, но во изменети и новонастанати околности. Исто така, кризата во Украина како и зголемување на цените на енергенсите и континуираниот пораст на цените на суровините, порастот на минималната плата а со тоа и пораст на сите останати плати, ке имаат влијание на пораст на трошоците на главните инпути во наредниот период. Друштвото ги презема сите неопходни активности за прилагодување на новонастаната енергетска криза со порастот на цените на енергенсите и суровините и ќе настојува да ги заврши сите предвидени активности согласно плановите за градење со инвеститорите, при што и цените на услугите и производите на друштвото ќе се адаптираат на тековните цени“, соопшти компанијата.
.webp){kind=icon}
