.webp){kind=icon}
„Жито Лукс“ АД Скопје ја заврши првата половина од 2022 година со загуба пред оданочување од 45.954.000 денари, што е зголемување во однос на истиот период минатата година кога загабата на компанијата изнесувала 564.000 денари, покажува неревидираниот биланс на успх на компанијата објавен преку Македонската берза.
„Глобалниот тренд на растечки цени на сите видови енергија (гас 320 проценти и струја 247 проценти во однос на минатата година) пропратено со зголемените цени на сите суровини во прехранбената индустрија (пченица 41 проценти), имаше големо влијание врз резултатите од работењето на компанијата во првата половина од 2022 година. Одлуката на Владата за замрзнување на цените во првите два месеца од годината, доведе до негативни нето резултати, кои беше тешко да се покријат во месеците кои следеа“, информираат од компанијата.
Оттаму додаваат дека приходите од продажба се зголемени за 13 проценти, при што приходите од продажба на домашен пазар бележат зголемување за 11 проценти, додека приходите од продажба на странски пазар се зголемени за 39 проценти во споредба со минатата година.
„Порастот на продажбите на домашен пазар се должи на корекцијата на цените која беше спроведена во март, мај и јуни но и тие зголемувања не беа доволни за да се покрие континуираниот растечки тренд на цените на инпутите. Останатите оперативни приходи изнесуваат 8.248.000 денари и се зголемени за 55 проценти како резултат на еднократен ефект, споредбено со истиот период минатата година“, соопшти компанијата.
Трошоците на произведени производи на „Жито Лукс“ во овој период изнесуваат 457.131.000 денари, што претставува зголемување за 28 проценти во споредба со истиот период претходната година.
„Зголемувањето се должи пред се на претходно споменатиот раст на производните инпути. Административните трошоци се зголемени за 12 проценти, додека трошоците за продажба и дистрибуција се зголемени за 10 проценти, како резултат од зголемените продажби“, велат од компанијата.
Вкупните инвестиции изнесуваат 15.989.000 денари, а поголемиот дел од нив се однесуваат за обнова на производствената опрема.
„И покрај очекувањата да дојде до стабилизирање на цените во претстојниот период, последните проекции не се многу ветувачки. Со фокус на полесно премостување на овој предизвикувачки период внимателно ја следиме ситуацијата и сите промени во локалната, регионалната и светската економија за да ги имаме сите потребни информации корисни во процесот на одлучување и ќе превземеме соодветни чекори, додека остануваме доследни и посветени на континуирано снабдување на пазарот со квалитетни производи“, соопшти компанијата.
