.webp){kind=icon}
„Медиковер Инвестмент Б.В.“ стекнува директна единствена контрола врз одредени субјекти на „Синлаб Интернационал ГмбХ“ лоцирани во одредени земји, вклучувајќи ја и Македонија каде што „Медиковер“ ќе стекне 98 проценти во приватна здравствена установа – дијагностичка лабораторија со биохемиска и микробиолошка лабораторија „Синлаб“ Скопје.
„Медиковер“ е индиректно претпријатие-ќерка во целосна сопственост на „Медиковер АБ“ (Medicover AB publ), кое е матичното друштво на групацијата на друштва „Медиковер“, водечки меѓународен давател на здравствени и дијагностички услуги основана во 1995 година. Хартиите од вредност на „Медиковер АБ“ котираат на стокхолмската берза Насдак. Групацијата „Медиковер“ управува со голем број амбулантски клиники, болници, установи за специјализирана нега, лаборатории и пунктови за вадење крв, преку две дивизии-услуги за здравствена заштита и дијагностички услуги и нејзините најголеми пазари се Полска, Германија, Романија, Индија и Украина.
ПЗУ „Синлаб“ е дел од истоимената групација која е водечки партнер во медицинските дијагностички услуги и специјалистичко тестирање во Европа. Групацијата нуди целосен опсег на иновативни и доверливи медицински дијагностички методи на пациенти, лекари, болници и клиники, влади и корпорации. Услугите на „Синлаб“ во Македонија се од областа на хуманата медицина и вклучуваат клиничка хемија, хематологија, коагулација, микробиологија, серологија, имунологија, генетика, молекуларна биологија, патологија, цитологија, ендокринологија и породилна нега.
За оваа концентрација на капитал е известена македонската Комисија за заштита на конкуренцијата.
