„Блекстоун“ (Blackstone Inc.) е блиску до склучување договор за купување на австралискиот оператор на центри за податоци „Ертранк“ (AirTrunk) за 20 милијарди австралиски долари (13,5 милијарди американски долари), вклучувајќи и долг, рекоа луѓе запознаени со ова прашање. Тоа би можело да биде една од најголемите зделки во дигиталната инфраструктура годинава.
„Блекстоун“ се појави како претпочитан купувач за „Ертранк“ откако ги надмина другите конкурентни понудувачи, велат упатените, кои побараа да не бидат идентификувани бидејќи прашањето сè уште не е јавно. Компанијата за управување со алтернативни средства со седиште во Њујорк и сопствениците на „Ертранк“, „Меккори груп“ (Macquarie Group Ltd.) и ПСП (PSP Investments), преговараат за последните детали за трансакцијата што може да се затвори веќе неделава, велат изворите.
Претставниците на „Блекстоун“, „Меккори“ и ПСП, одбија да коментираат.
„Блекстоун“ преговарал со банки за финансирање на долгот за да ја поддржи својата понуда за „Ертранк“, објави „Блумберг“ (Bloomberg) минатата недела. „Блекстоун“ се натпреваруваше со посебен конзорциум, кој ги вклучува ИФМ (IFM Investors Pty), „Диџитал бригејд“ (DigitalBridge Group Inc.), „Глобал инфрастракчур партнерс“ (Global Infrastructure Partners) и „Силвер лејк“ (Silver Lake Management), посочија луѓето запознаени со ова прашање.
Пазарот на облак-услуги во Азија се загрева, со ККР (KKR & Co.), која се согласи да купи 20 отсто од акциите во центрите за податоци на „Сингапур телекомуникејшнс“ (Singapore Telecommunications Ltd.) минатата година. Една година претходно „Блекстоун“ ја лансира својата прва платформа (целосно во негова сопственост) поврзана со секторот во Азија.
„Меккори“ има долга историја на инвестирање во дигитална инфраструктура и е една од најголемите активни фирми во индустријата. Ани Сачкрофт и Бен Веј помагаат во управувањето со инвестицијата на „Меккори асет менаџмент“ (Macquarie Asset Management) во „Ертранк“ од 2019 година.
„Ертранк“ управува со центри за податоци во Австралија, Сингапур, Хонгконг, Јапонија и Малезија, според неговата веб-страница. Група предводена од инфраструктурниот разгранок на „Меккори“ ја презеде контролата врз компанијата во 2020 година со договор што ја процени на околу 3 милијарди австралиски долари, објави тогаш „Блумберг“. Пред тоа беше во сопственост на инвеститори, вклучувајќи ја и банката „Голдман Сакс“ (Goldman Sachs Group Inc).
.webp){kind=icon}
