text size
Кинескиот производител на електрични автомобили БЈД (BYD Co.) ги зголеми проекциите за продажба на електрични возила и хибриди за годинаva, најмногу поради растот на продажбата на хибриди.
Компанијата со седиште во Шенжен ги зголеми проекциите за продажба на овие модели на четири милиони годинава, напишаа аналитичарот на банката „Морган Стенли“ (Morgan Stanley), Тим Хсијао, и неговите колеги. Според Хсијао, кој се повикува на коментарите од раководството на кинеската компанија, претходните проекции предвидуваа продажба на 3,6 милиони возила.
Промената е резултат на поголемата побарувачка од кинеските потрошувачи за електрични возила и хибриди. Според официјалните податоци, во последниот месец се продадени повеќе од еден милион возила со погон што не е само со внатрешно согорување, што е првпат да се премине овој праг. Овие возила во Кина имаат пазарен удел од 53,8 отсто и се побројни од моделите со внатрешно согорување.
Во аналитичката белешка исто така се истакнува дека растот на продажбата и новите проекции може да им се припишат на новите и подобрени модели што сега се достапни на пазарот.
БЈД не одговори на прашањата на „Блумберг“.
Најголемиот кинески производител на автомобили може да биде задоволен и од бројот на нарачки за својот хибрид, кој може да помине и до 2.100 километри без полнење гориво или полнење на батеријата.
Од почетокот на годината БЈД има продадено 2,3 милиона електрични возила и хибриди, што значи дека до крајот на годината ќе треба да продава по 425.000 возила месечно за да ја исполни гореспоменатата цел од четири милиони. Тоа би значело и дека БЈД ќе ги надмине најголемите производители од САД и Јапонија според продажбата.
Во белешката на аналитичарите се наведува и дека претставниците на компанијата ја повториле својата намера да го зголемат извозот. До крајот на годината уште еден брод ќе биде ангажиран за извоз на автомобили, а БЈД очекува дека продажбата во странство ќе се зголеми на 450.000 возила до крајот на годината. Првичната цел на компанијата беше да извезе половина милион возила.
Продажбата на електрични возила и хибриди во Кина годинава расте благодарение на субвенциите во вредност од 20.000 јуани за одредени модели.
.webp){kind=icon}
