Отпуштен работник од Твитер го победи Илон Маск на суд

Илон Маск загуби правна битка за неисплатена испратнина на поранешен вработен во Твитер (Twitter), кој бил отпуштен кога милијардерот ја презеде социјалната платформа во 2022 година, според документ во кој „Блумберг њуз“ (Bloomberg News) имал увид.

Решението на спорот, коj се водел преку арбитража, доаѓа речиси две години откако Маск го купи Твитер за 44 милијарди долари и веднаш отпушти повеќе од половина од вработените.

Овој потег доведе до повеќе од 2.000 жалби од поранешни вработени што тврдеа дека не им е исплатена целосната плата. Победата во случајот од петокот може да постави преседан за илјадниците поранешни вработени што поднеле слични арбитражни поплаки.

„Арбитерот му ја додели целата испратнина на нашиот клиент“, посочува адвокатката Шенон Лис-Риордан во меморандум од понеделникот, кој бил доставен до двајца поранешни вработени во Твитер, кои одбија да бидат идентификувани бидејќи станува збор за доверливи информации. „Возбудени сме за овој развој и се надеваме дека ова навестува уште повеќе добри вести во иднина“.

Лис-Риордан одби да коментира или да го објави писменото решение на арбитерот по затворената постапка на нејзиниот клиент со приватен судија.

Претставници на платформата X (поранешен Твитер) не одговорија на барањето за коментар.

Во јули, Маск и X - името што милијардерот го избра за да го ребрендира Твитер - победија во однос на тужбата што тврдеше дека најмалку 500 милиони долари испратнина им се должат на околу 6.000 отпуштени вработени во согласност со одредбите од федералниот закон за безбедност на приходите за пензионирање на вработените.

Во меморандумот, Лис-Риордан наведе дека 15 случаи веќе имале арбитражни сослушувања и очекува повеќе пресуди во наредните неколку месеци.

„Се надеваме дека ако дојдат уште пресуди во наша корист, Твитер/X ќе биде подготвен да седне на маса и да преговара за спогодба со сите“, напиша таа.