.webp){kind=icon}
Многу нешта се менуваат во „Опен еј-ај“ (OpenAI). Има планови за можност да се преиспита непрофитниот статус на компанијата, тековна кампања за собирање средства, која може речиси двојно да ја зголеми нејзината вредност, и разговори за да му се даде на главниот извршен директор Сем Алтман учество во капиталот - сето ова во контекст на заминувањата на високи раководители.
Во зависност од тоа како ќе се одвиваат работите, Алтман, кој веќе е милијардер, може од ова да излезе како уште побогат човек.
Доколку кампањата за собирање средства - која, според луѓе запознаени со ситуацијата, ја проценува вредноста на „Опен еј-ај“ на 150 милијарди долари - успее и Алтман добие 7 отсто учество, неговото богатство може да порасне за повеќе од 10 милијарди долари, според индексот на милијардери на „Блумберг“ (Bloomberg). Тоа би го сместило меѓу најбогатите луѓе во светот.
Многу нешта сè уште не се познати за плановите, кои се во процес на преговори - вклучувајќи ги и точната големина и структура на можниот удел на Алтман, и дали тоа навистина ќе се реализира. „Опен еј-ај“ не даде веднаш коментар за овие дискусии.
Сепак, одлуката означува нов пресврт во сложената сага на „Опен еј-ај“, водечката компанија во развојот на вештачката интелигенција, основана како непрофитна организација со цел да ја развива технологијата на начин што е безбеден и корисен за човештвото.
Во март „Блумберг њуз“ (Bloomberg News) го процени богатството на Алтман на повеќе од 2 милијарди долари. Неговите средства главно се состојат од пари вложени во фондови за ризичен капитал и стартапи. Тој исто така има удели во компании како „Неуралинк“ (Neuralink Corp.) на Илон Маск, кои не го откриваат неговото прецизно сопствеништво и не беа вклучени во пресметките.
Во таа пресметка не беше вклучен ниту еден удел во „Опен еј-ај“. Алтман постојано изјавува дека нема капитално учество во компанијата бидејќи веќе има доволно пари, иако понекогаш додава дека посакувал да има удел за луѓето да престанат да го прашуваат за тоа.
„Платен сум доволно за здравствено осигурување; немам капитално учество во ’Опен еј-ај’“, сведочеше Алтман на сослушување во Сенатот минатата година. „Ова го правам затоа што го сакам“.
Добиените акции од „Опен еј-ај“ би му овозможиле на Алтман да ужива во плодовите од неговиот досега највреден ангажман. На почетокот од месецов „Блумберг њуз“ објави дека „Опен еј-ај“ е во преговори да собере 6,5 милијарди долари од инвеститори, со процена на вредноста од 150 милијарди долари, што би ја направило еден од највредните стартапи во светот.
И покрај високата процена на вредноста, компанијата губи клучни лидери. Во средата главната технолошка директорка Мира Мурати објави на X дека ја напушта компанијата „за да создаде време и простор за сопствени истражувања“, истиот ден кога главниот директор за истражување Боб Мекгру изјави дека е „време за пауза“. Нивното заминување ќе следува по заминувањата на поранешниот главен научник Илја Суцкевер и истражувачот Џон Шулман, двајцата соосновачи на компанијата. Друг член на основачкиот тим на „Опен еј-ај“, претседателот Грег Брокман, исто така изјави дека ќе ја напушти до крајот на годината.
