.webp){kind=icon}
Акциите на „Нетфликс“ (Netflix Inc.) скокнаа на рекордно високо ниво откако стриминг-компанијата додаде повеќе од 5 милиони нови корисници во третиот квартал, надминувајќи ги очекувањата на Волстрит за сите клучни финансиски метрики.
Продажбата во истиот период порасна за 15 отсто, на 9,83 милијарди долари, соопшти компанијата во четвртокот, додека заработката се зголеми на 5,40 долари по акција. Аналитичарите предвидуваа дека „Нетфликс“ ќе додаде 4,52 милиони претплатници.
Акциите пораснаа за 11 отсто, на 763,89 долари, во петокот во Њујорк, што е најголем раст во последната година. Вредноста на акциите повеќекратно се зголеми од мај 2022 година, кога забавувањето на растот на компанијата доведе до голема распродажба и ги исплаши инвеститорите за иднината на индустријата за забава.
Оттогаш „Нетфликс“ додаде повеќе од 60 милиони корисници, благодарение на мерките против споделување лозинки и воведувањето поевтина претплата со реклами. Компанијата го заврши кварталот со 282,7 милиони претплатници.
„Чувствуваме дека компанијата е во одлична состојба“, изјави коизвршниот директор Тед Сарандос во разговор со аналитичарите. „Имавме план за повторно забрзување на растот и го исполнивме тој план“.
Повеќето аналитичари веруваат дека растот поради мерките против споделување лозинки е привремен и дека „Нетфликс“ наскоро ќе треба да најде друг начин за раст. Компанијата сè уште нема значајни финансиски резултати од инвестициите во рекламирање или видеоигри, а некои на Волстрит се загрижени дека акциите се преценети.
Растот на претплатниците „изгледа како да забавува“, според аналитичарот Дејв Хегер од „Едврд Џонс“ (Edward Jones).
Сепак, „Нетфликс“ продолжува да остварува посилен раст од очекуваното, а раководството се обидува да ги увери инвеститорите дека компанијата ќе има корист од мерките против споделување лозинки во наредните години.
Компанијата во четвртокот предвиде дека продажбата следната година ќе се зголеми од 11 до 13 отсто - до 44 милијарди долари - преку комбинација на нови корисници и зголемување на цените. „Нетфликс“ ги зголеми цените во Шпанија и во Италија во петокот и изјави дека ќе укине една од поевтините претплати во Бразил подоцна во овој квартал.
На два региона - Европа, Блискиот Исток и Африка, како и Азија-Пацифик - отпаѓаат речиси сите нови корисници на компанијата. „Нетфликс“ изгуби корисници во Латинска Америка за првпат од почетокот на 2023 година. Компанијата исто така изјави дека бројот на нови претплатници во тековниот, четврти квартал, ќе го надмине бројот од третиот квартал.
