Божиќните бонуси во Хрватска стигнуваат и до 3.000 евра

Хрватите имаат големи очекувања од своите работодавци за овие празници во однос на божиќните бонуси и награди, а убаво е да се види дека годинава тие очекувања во голема мера ќе се исполнат.

Истраживме колкави конкретни суми им плаќаат големите домашни компании на своите работници пред Божиќ и Нова година и дознавме дека се нуди сѐ и сешто – од 13-та плата, значителни стимулации, ваучери и бонуси, преку подароци за деца и подароци во вид на безготовински донации, до еднократни плаќања и награди. Најдарежливите бројки надминуваат 2.000 евра, некои компании даваат многу помалку, но просекот од нашиот примерок е солиден.

Работниците сѐ повеќе го гледаат божиќниот бонус како право

За почеток ќе се повикаме на новото истражување на порталот „Мојпосао“, според кое вработените во Хрватска очекуваат 31 отсто поголем божиќен бонус од лани. Поточно, 86 отсто од работниците очекуваат божиќен бонус во просечен износ од 465 евра, што е значително повеќе од ланскиот просек, кој изнесуваше 354 евра. Треба да се спомене дека во 2023 година 85 отсто од анкетираните вработени конечно го добиле божиќниот бонус.

Истражувањето покажа дека пред воведувањето на еврото, предвидувањата на работниците за износите на божиќните бонуси беа доста точни, но минатата година имаше значителен диспаритет меѓу очекувањата и реалните исплати. „Иако очекувањата на вработените отсекогаш ги надминувале реалните исплати, разликата била релативно мала до 2023 година, додека сега тие значително ги преценуваат сумите што на крајот ќе ги добијат“, пишува порталот „Мојпосао“.

Да споменеме и дека 14 отсто од испитаниците што не очекуваат посебни награди како главна причина за тоа ја наведуваат политиката на компанијата или лошите деловни резултати.

Интересно е и како се менува перцепцијата за божиќниот бонус кај работниците. Сѐ помал број од нив (29 отсто) смета дека исплатата на божиќниот бонус е исклучиво резултат на добрата волја на работодавецот, а дури 71 отсто сметаат дека тоа е право на секој вработен и негодуваат ако работодавците не го платат.

Bloomberg Adria

Кои работодавци се најдарежливи?

Сега да одиме на конкретни износи. На своите работници годинава најмногу пари ќе им исплати туристичката компанија „Валамар“. Вработените што биле во компанијата цела година ќе добијат 13-та плата (од 1.000 до 2.000 евра) и божиќен бонус во вкупен нето износ од 1.000 евра, додека сезонците ќе добијат божиќни бонуси во износ од 70 до 200 евра, во зависност од должина на работниот однос.

„Валамар“ на своите вработени ќе им обезбеди и дополнителни награди – подарок за деца во износ од 140 евра по дете и ваучери „Валфреско директ“ во вредност од 133 евра. Долгогодишните вработени годинава ќе добијат и јубилејни награди во согласност со годините на работа во компанијата, а најдобрите вработени и тимови во 2024 година дополнително ќе бидат наградени со хрватска туристичка картичка во износ до 350 евра.

Дрогеријата ДМ му дише во врат на „Валамар“. Секој нивни вработен ќе добие стимулација за плата и подарок за децата од 140 евра. Само мала напомена, просечната плата во ДМ изнесува над 1.800 евра.

Друга локална туристичка компанија – „Аминес хотелс и ресортс“ – има широки раце. Во пресрет на претстојните празници, нивните работници ќе добијат божиќен бонус до 600 евра, подарок за дете од 140 евра и подарок во вид на безготовински донации од 133 евра.

„Атлантик“ годишно плаќа 1.450 евра по работник

Сосема пристојни износи годинава ќе добијат и вработените во „Атлантик груп“. Тие се пофалија дека нивните работници во Хрватска во декември ќе добијат вкупно 700 евра нето, што е комбинација на специјална исплата на крајот на годината и награда за годинашните исклучителни резултати. Дополнително подаруваат и по 140 евра за деца.

„Така, во ’Атлантик’, со сите досегашни уплати во текот на годината, ќе се исплатат вкупно 1.450 евра по вработен во 2024 година и дополнително подарок за децата“, ни рекоа од компанијата.

Не штеди ниту во „Ериксон Никола Тесла“. Нивниот директор за човечки ресурси Жељко Антолиќ ни изјави дека пред Божиќ планираат да ја платат авансната исплата на наградата за сите вработени во форма на ваучери.

Работниците ќе добијат ваучер во износ од 133 евра и вториот дел од регресот за годишен одмор во износ од 350 евра, а вработените што имаат деца до 15 години ќе добијат и паричен подарок за деца во износ од 140 евра по дете. „Исто така, деновиве на сите вработени им исплативме еднократен бонус од 200 евра бруто по повод 75-годишнината од успешното работење на компанијата“, објасни Антолиќ.

„Плива“ годинава дава божиќен бонус во износ од 437,99 евра, додека вработените во „Ерсте и Штаермеркише банка“ ќе добијат божиќен бонус од 400 евра, подарок од 140 евра за деца и исплата од 240 евра во затворениот доброволен пензиски фонд „Ерсте“.

Што се однесува до телекомуникациите, „А1 Хрватска“ дава 500 евра божиќен бонус и 100 евра подарок за децата во форма на ваучери за подарок. Од „Хрватски телеком“ ни одговорија дека сè уште не им ја соопштиле висината на божиќните бонуси и бонусите на нивните работници, но дека сигурно ќе ги има, а слична е ситуацијата и во „Телемах“.

Трговците на мало имаа добра година, а тоа ќе го почувствуваат и нивните вработени. На вработените во „Кауфланд“ и „Певекс“ ќе им биде исплатен божиќен бонус од по 400 евра. Рекордерот по профит „Лидл“ плаќа божиќен бонус од 350 евра и подарок за деца од 30 евра. КТЦ дава 300 евра во кеш и уште 70 евра преку пакети со подароци за децата.

Bloomberg Adria

Не штеди ни државата

Од компаниите во мнозинска или делумна сопственост на државата, „Хрватска пошта“ најмногу им дава на работниците (500 евра), потоа ХЕП со божиќен бонус од 497,71 евра, потоа „ХЖ инфраструктура“ (250 евра), „Хрватски автопатишта“ (200 евра) и „Хрватска патишта“ (150 евра).

Вработените во „Подравка“ од Копривница ќе добијат божиќен бонус од 200 евра и подарок од 133 евра за деца, а колективниот договор таква исплата им гарантира и на работниците на „Кроација ерлајнс“, но оттаму ни рекоа дека сè уште не ја дефинирале сумата.

Слична е ситуацијата и во „Спан“, каде што висината на уплатата зависи од резултатите од работењето на компанијата.

Во моментов нема коментари за веста. Биди прв да коментира...

Остави коментар