Топ 10 највредни брендови во светот

Листата на највредни светски брендови е уште една потврда за технолошката доминација на САД. Од десет, шест се токму од оваа земја, а речиси сите се брендови на познати технолошки компании.

На списокот на десетте највредни се наоѓа само еден европски бренд, два се кинески и еден е јужнокорејски.

Титулата за највреден светски бренд во 2024 година ја носи американскиот „Епл“ (Apple), најпознат по паметните телефони ајфон. Неговата вредност е проценета на 516,6 милијарди долари, што е околу 220 милијарди долари повеќе од минатата година, кога „Епл“ беше втор на списокот на највредни светски брендови.

Минатата година ласкавата титула ја освои „Амазон“ (Amazon), со проценета вредност од 299,3 милијарди евра. Брендот зад кој стои истоимената компанија на Џеф Безос годинава се наоѓа на четвртото место, со вредност од 308,9 милијарди евра, покажуваат податоците на „Бренд директори“ (Brand Directory).

Benjamin Girette/Bloomberg

Веднаш зад „Епл“, односно на второто место се наоѓа „Мајкрософт“, кој годинава достигна вредност од 340,4 милијарди долари. Во однос на минатата година, тоа е скок од речиси 150 милијарди долари.

По него следува „Гугл“ (Google), кој со 333,4 милијарди евра ја задржа истата позиција како и лани. На петтото место е јужнокорејскиот „Самсунг“ (Samsung), со проценета вредност од 99,4 милијарди долари, потоа американскиот „Волмарт“ (Walmart), со 96,8 милијарди долари вредност, и кинескиот Тикток (TikTok), со 84,2 милијарди долари.

Тука е и Фејсбук (Facebook), во сопственост на популарната „Мета“ (Meta), кој со вредност од 75,7 милијарди евра го зазеде осмото место. Во однос на минатата година, кога брендот се наоѓаше на 14-то место, неговата вредност порасна за околу 17 милијарди долари.

Марк Закерберг од „Мета“ Bloomberg

На деветтото место е единствениот европски бренд, „Дојче телеком“ (Deutsche Telekom), кој е проценет на 73,3 милијарди долари, а последен на списокот на десетте највредни брендови е кинескиот ИЦБЦ (ICBC), со вредност од 71,8 милијарди долари.

Сепак, Европа предничи кога станува збор за луксузните брендови. Меѓу десетте највредни луксузни брендови само еден е американски, а апсолутен победник во луксузот е Франција.

Највредниот луксузен бренд во 2024 година е „Порше“ (Porsche), кој е проценет на 43,1 милијарди долари. Брендот за повеќе од десет милијарди долари го надмина вториот највреден луксузен бренд - „Луј Витон“ (Louis Vuitton). Според процената на „Бренд директори“, брендот на една од најпознатите француски модни куќи ЛВМХ (LVMH / Moët Hennessy Louis Vuitton) годинава достигна вредност од 32,2 милијарди долари.

Depositphotos

Нивниот француски конкурент „Шанел“ (Chanel) го зазеде третото место, со 26,1 милијарди долари вредност, а следуваат францускиот „Хермес“ (Hermès), со 16,7 милијарди долари, и италијанскиот „Гучи“ (Gucci), со 14,9 милијарди долари. Меѓу највредните луксузни брендови се наоѓаат и „Диор“ (Dior), „Картие“ (Cartier), „Ролекс“ (Rolex), „Ферари“ (Ferrari) и единствениот американски бренд, а тоа е „Тифани“ (Tiffany & Co).