Директорот на Тикток на вечера со Трамп, ќе се спаси ли мрежата од забрана во САД

Извршниот директор на Тикток (TikTok), Шоу Чу, се сретна со новоизбраниот претседател Доналд Трамп во Мар-а-Лаго во понеделникот, само неколку недели пред популарната апликација за кратки видеа да биде забранета во САД поради загриженост за националната безбедност.

Приватната средба, потврдена од извор запознаен со дискусијата, се случи само неколку часа откако Трамп предложи дека на некој начин ќе се обиде да ја поништи забраната за да го спаси Тикток, кој го користеше како платформа за да допре до младите гласачи за време на кампањата.

„Ќе го разгледаме Тикток“, им рече Трамп на новинарите во понеделникот од Мар-а-Лаго. „Знаете, имам топло место во моето срце за Тикток“. Трамп претходно се обиде да ја забрани платформата во 2020 година, за време на неговиот прв мандат како претседател, но оттогаш го промени својот став за апликацијата.

Не беше веднаш јасно за што разговарале Трамп и Чу. Портпаролот на Тикток не одговори на барањето за коментар. „Си-ен-ен“ (CNN) прв извести за средбата.

Забраната, која е закажана за 19 јануари, според законот потпишан од претседателот Џо Бајден, се активира освен ако кинеската матична компанија на Тикток, „Бајт денс“ (ByteDance Ltd.), не се согласи да ја продаде апликацијата на американски сопственик.

Компанијата се бори против законот по судски пат. Федералниот апелациски суд во Вашингтон месецов одлучи да го потврди законот за продажба или забрана и потоа го одби барањето на Тикток за забрана. Компанијата за социјални мрежи во понеделникот побара од Врховниот суд да го разгледа случајот.

Чу е еден од многуте технолошки лидери што избираат да се сретнат со Трамп пред неговата инаугурација следниот месец. Извршниот директор на „Мета“ (Meta Platforms Inc.), Марк Закерберг, вечераше со Трамп во Мар-а-Лаго ноќта пред Денот на благодарноста, а извршниот директор на „Епл“ (Apple Inc.), Тим Кук, исто така се сретна со Трамп на вечера во Мар-а-Лаго минатата недела.

Во моментов нема коментари за веста. Биди прв да коментира...

Остави коментар