„ЏП Морган“ собори рекорд, па директорот доби плата од 39 милиони долари

„ЏП Морган“ (JPMorgan Chase & Co.) ја зголеми платата на извршниот директор Џејми Дајмон на 39 милиони долари за 2024-та, година во која најголемата американска банка го надмина сопствениот рекорд за највисока годишна добивка во историјата на американското банкарство.

Одборот му додели на Дајмон плата од 1,5 милион долари и 37,5 милиони долари како стимулации базирани на перформанси, според регулаторниот  поднесок. Неговата плата е зголемена за 8,3 отсто од 2023 година, кога заработи 36 милиони долари.

„Во текот на годината, под раководството на г. Дајмон, фирмата продолжи да им служи на клиентите и корисниците во динамично глобално макроопкружување карактеризирано со тековни геополитички тензии и економска неизвесност“, посочува одборот во извештајот.

Дајмон, кој има 68 години, ја води „ЏП Морган“ (JPMorgan) речиси две децении, правејќи ја најголема американска банка. Фирмата имаше профит од 58,5 милијарди долари минатата година, период во кој акциите пораснаа за 41 отсто.

Фирмата исто така соопшти дека, како и минатата година, Дајмон и неговото семејство планираат да продадат околу милион акции „за финансиска диверзификација и даночно планирање“. Милијардерот извршен директор и неговото семејство моментално поседуваат околу 7,5 милиони акции.

Прашањето кога Дајмон ќе се пензионира и кој би можел да го наследи се поставува во „ЏП Морган“ со години. Дајмон неодамна се откажа од долгогодишната шега дека пензионирањето е пет години подалеку, без разлика кога ќе биде прашан. Фирмата ги прераспореди своите врвни редови минатата недела по вторпат во годината.

„Како дел од нивната евалуација и одредување, одборот го разгледа континуираниот развој на врвните извршни директори под водство на г. Дајмон за да водат денес и во иднина“, напиша одборот во извештајот.

„ЏП Морган“ е втората голема банка што ја објави платата на извршниот директор за 2024 година. „Голдман Сакс“ (Goldman Sachs Group Inc.) му додели на извршниот директор Дејвид Соломон 39 милиони долари, што е зголемување од 26 отсто од претходната година, и исто така им додели нему и на претседателот Џон Валдрон награди за задржување во вредност од 80 милиони долари за секого, за да ги поттикне да останат.