Илон Маск и неговата социјална мрежа X имаат собрано речиси милијарда долари нов капитал од инвеститори, според луѓе запознаени со ситуацијата - договор што ја вреднува компанијата на исто ниво како кога Маск ја приватизира во 2022 година.
Маск лично учествувал во собирањето на капиталот, велат некои од упатените, кои побарале да останат анонимни бидејќи дискутираат за приватни информации. Компанијата размислува да искористи дел од средствата за да го намали преостанатиот долг, рекол еден од изворите.
Договорот ја вреднува акцијата на X на околу 32 милијарди долари. Купувањето на Твитер вклучувало најмалку 12,5 милијарди долари долг, што значи дека последното собирање средства било завршено на приближно истата вредност од 44 милијарди долари како почетната аквизиција на Маск.
ДЦП (Darsana Capital Partners), кој купи дел од долгот на X во текот на годинава, учествувал во собирањето на капиталот, велат некои од луѓето. Инвестициската фирма „1789 Капитал“ (1789 Capital), која ги поддржува „Екс еј-ај“ (xAI) и „Спејс-екс“ (SpaceX), исто така инвестирала, според лице запознаено со ситуацијата.
Претставници на X, ДЦП и на 1789 одбиле да коментираат.
Маск редовно им се обраќа на приватните пазари за поддршка на неколку од неговите компании, вклучувајќи ги и „Спејс екс“, која заврши понуда за купување вреднувајќи го стартапот на околу 350 милијарди долари, и „Екс еј-ај“, која се вели дека бара инвеститори за собирање нови средства во вредност од 75 милијарди долари.
Во исто време кога компаниите на Маск добиваат поддршка на приватните пазари, акциите на неговиот производител на автомобили „Тесла“ (Tesla Inc.) паднаа за повеќе од 40 отсто досега годинава, делумно поради неговата политичка инволвираност, која одврати некои потрошувачи од неговите автомобили. Зголемената конкуренција исто така влијае на акциите. Во вторникот „Тесла“ падна за 5,3 отсто по вестите дека кинескиот производител на автомобили БЈД (BYD Co.) претставил електричен автомобил што може да се полни толку брзо како што се полни автомобил со бензин.
Откако Маск го купи Твитер и го преименува во X, компанијата помина низ турбулентен период, обележан со длабоки кратења и заминувања на огласувачи. Бизнисот со огласување на X претрпе удар веднаш по купувањето, бидејќи многу огласувачи ја напуштија услугата или го паузираа своето трошење, поради загриженост дека нивните пораки можат да се појават покрај несоодветна содржина.
Маск оттогаш се бори со огласувачите на суд за да ги врати назад. X тужи неколку големи бренда за задржување на трошоците за огласување, тврдејќи дека нивната одлука претставува антиконкурентско однесување.
Некои огласувачи почнаа да се враќаат, иако инсајдери од индустријата веруваат дека заканата од правна акција од страна на Маск веројатно влијае врз таквите одлуки, според „Блумберг њуз“. Моќната улога на Маск во администрацијата на Трамп исто така била фактор за некои огласувачи, кои се загрижени милијардерот да не ги земе „на пик“.
Бизнисот на X закрепна по реизборот на претседателот Доналд Трамп, иако ФИ (Fidelity Investments), инвеститор во X, го намали својот удел во компанијата за 68 отсто до јануари. Покрај враќањето на некои огласувачи, банкари неодамна продале долг на X што го држеле со години по почетната аквизиција на Маск.
.webp){kind=icon}
Во моментов нема коментари за веста. Биди прв да коментира...