„Мерцедес-Бенц“ (Mercedes – Benz Group AG) размислува да ги повлече своите најевтини модели од САД затоа што царините за автомобили на претседателот Доналд Трамп веројатно ќе ја направат нивната продажба економски неисплатлива, пишува „Блумберг“ повикувајќи се на добро информирани извори.
Германскиот производител на автомобили размислува за намалување или стопирање на продажбата на повеќе т.н. модели на почетно ниво, како што е малиот спортски теренец ГЛА, како дел од пошироките планови за итна состојба во врска со царините, велат лица што не сакаат да зборуваат јавно. Царините од 25 отсто на Трамп треба да стапат во сила неделава.
„Мерцедес“ не донел конечна одлука и сè уште може да го смени курсот во зависност од тоа како се спроведуваат царините, велат изворите. Недостигот од јасни насоки од Вашингтон ги фрустрира менаџерите и не се сигурни како да одговорат, велат тие. Компанијата има цел да ги максимизира своите продажби во САД, изјави компанискиот портпарол, одбивајќи да коментира понатаму.
Прочитај повеќе

„Порше“ и „Мерцедес“ може да загубат 3,7 милијарди долари поради царините
Царините на Трамп ќе ги погодат извозниците на автомобили и на автоделови.
27.03.2025

„Мерцедес“ ќе продава електрично возило за само 50.000 евра
Почетната цена е обид за натпревар со „Тесла“
15.03.2025

Како се финансираат тимовите во Формула 1?
Формула 1 не е само возбудлив спорт на брзина и прецизност туку е и џиновска деловна империја.
13.03.2025

Македонските автомобилски компании се најмногу изложени на ризик од царините на Трамп
Негативните последици од одлуките на Трамп ќе ги почувствуваат компаниите од регионот Адрија кои се дел од европскиот синџир на снабдување за автомобилската индустрија.
02.04.2025

Дали тарифната војна на Трамп носи ренесанса или рецесија за САД?
Повеќе од половина од компаниите од S&P 500 ги наведуваат тарифите како фактор на ризик
01.04.2025

Волстрит деновиве е место на „фрустрација и исцрпеност“
Консензус е дека во моментов нема начин да се избегне колапсот на пазарот. Многу трговци се држат настрана од ризикот бидејќи падот е преголем.
01.04.2025
„Мерцедес“ е меѓу производителите што се во голем ризик од трговската војна што се разгорува, која може да ја намали продажбата и да ги наруши синџирите на снабдување. „Астон Мартин“ (Aston Martin Lagonda Global Holdings Plc) и „Ферари“ (Ferrari NV) планираат да ги покачат цените на некои од нивните автомобили во САД, додека, пак, „Фолксваген“ (Volkswagen AG) размислува за проширување на локалното производство, поради третманот на домашен производител во таков случај. Претседателот на „Стелантис“ (Stellantis NV), Џон Елкан, се состана со Трамп во понеделникот, а оваа компанија, под чија капа е и „Крајслер“ (Chrysler), е дел од групата производители на автомобили што прават последен обид да ја разубедат неговата администрација.
Со тоа што ќе го намали присуството во најниските нивоа од премиум пазарот на возила, „Мерцедес“ ќе може да ги избегне царините за своите најмалку профитабилни модели. За моделите како ГЛА - кој започнува од околу 43.000 долари во САД - давачките би можеле да ги претворат и онака веќе минималните маржи во загуби доколку трошокот не се пренесе врз купувачите. Овој потег исто така може да ги поттикне возачите да се одлучат за попрестижните модели. САД остануваат клучен пазар за „Мерцедес“ поради големата побарувачка за попрофитабилните, поголеми модели на теренци.
Акциите на „Мерцедес“ паднаа дури за 1,1 процент во средата, а изминатата година загубија околу една четвртина од вредноста.
Под водство на главниот извршен директор Ола Калениус, „Мерцедес“ настојува да освои поголем дел од премиум пазарот насочувајќи ги ресурсите кон своите најскапи модели, како што е седанот од класата С, додека го намалува производството на компактните модели.
Компанијата ја одложи својата цел да произведува само електрични возила и ги возобнови инвестициите во возила со мотори со внатрешно согорување откако побарувачката за електрични опадна. Во февруари „Мерцедес“ најави пониски профитни маржи поради жестоката конкуренција, промената на расположението на потрошувачите и трговските тензии.
„Мерцедес“ и „Порше“ (Porsche AG) ќе бидат најтешко погодени од новите американски царини и ќе се соочат со потенцијален удар од 3,4 милијарди евра (3,7 милијарди долари), процени минатата недела „Блумберг интелиџенс“.
Трговските потези на Трамп, наменети да ги вратат американските работни места, предизвикаа хаос низ индустријата. Бидејќи клучните детали сè уште недостигаат - особено Анекс 1, официјалната листа на делови и компоненти што подлежат на тарифа од 25 отсто – способноста на компаниите да дејствуваат е сериозно ограничена, рече Ендрју Бергбаум, управен директор во „Аликс партнерс“ (AlixPartners), консултантска компанија што советува неколку светски производители на автомобили.
„Тоа е голема главоболка“, рече Бергбаум. „Незнаењето за тоа што доаѓа прави исклучително тешко да се донесе каква било стратегиска одлука“.