Новата тактика на „Нетфликс“ - Не е важно колку луѓе ве гледаат, туку колку плаќате

Американскиот давател на услуги за стриминг „Нетфликс“ ги надмина очекувањата на аналитичарите во првиот квартал од 2025 година. Имаше приход од 10,5 милијарди долари и профит од 2,89 милијарди долари, покажаа деловните податоци. Оперативните приходи се зголемија за 27 отсто на 3,3 милијарди долари, додека аналитичарите очекуваа 3 милијарди долари. Оперативната маржа се зголеми на 31,7 отсто.

Компанијата повеќе не известува за броеви на претплатници на квартална основа, туку има намера да ги објави клучните бројки за раст на претплатниците кога ќе се достигне пресвртница. Во својот последен јануарски извештај, „Нетфликс“ ги надмина процените и додаде 18,9 милиони претплатници, со што вкупниот број на корисници ширум светот достигна 301,6 милиони.

Бизнисот на „Нетфликс“ се покажа отпорен на рецесии. „Внимателно го следиме однесувањето на потрошувачите и економскиот развој, но засега не гледаме ништо значајно што треба особено да се истакне. Ги следиме индикаторите за задржување на клиентите, кои се стабилни и силни“, рече извршниот директор Грегори К. Петерс во разговорот со инвеститорите. Тој додаде дека имаат повеќе од 700 милиони гледачи „Сè уште имаме стотици милиони потенцијални претплатници“.

Американскиот и канадскиот пазар забележаа забавување на растот во првиот квартал, што се должи на повисоките цени и пониските приходи од божиќното рекламирање поврзано со НФЛ. Приходите во регионот се зголемени за девет отсто, додека во последниот квартал од 2024 година пораснале со стапка од 15 отсто. Растот на приходите во САД и Канада се очекува повторно да се забрза во вториот квартал.

Како што забавува растот на претплатниците, „Нетфликс“ се обидува да ги зголеми приходите од постоечките корисници преку рекламирање и повисоки цени, пишува „Блумберг“. Компанијата воведува нова технологија за рекламирање на одредени пазари и ги зголемува цените на своите услуги во Франција.

Акциите на „Нетфликс“ пораснаа за четири отсто по објавувањето на резултатите и денот го завршија на 973 долари. Во 2025 година, акциите пораснаа за девет отсто, додека во истиот период, акциите на другите технолошки гиганти како „Епл“, „Енвидија“ и „Тесла“ значително изгубија во вредност. Поголемиот дел од аналитичарите на „Блумберг“, околу 75 отсто, препорачуваат купување на акциите. Околу 21 отсто советуваат чекање, додека само три отсто препорачуваат продажба.

Соопштението на „Нетфликс“ ја започнува сезоната на објави за заработка од технолошките компании. Циклусот се одвива во заднина на економска несигурност поврзана со можното воведување тарифи од администрацијата на Трамп. Аналитичарите од Волстрит го оценуваат „Нетфликс“ како една од најмалку ранливите компании, бидејќи се занимава со обезбедување услуги, а не со продажба на физички производи.