„Шејн“ ги поскапе производите за американските купувачи - некои за дури 377 отсто

Кинескиот онлајн гигант „Шејн“ (Shein Group Ltd.) ги зголеми цените на своите производи на американскиот пазар - од фустани до кујнски прибор - во пресрет на претстојните царини што ќе ги опфатат и малите пратки, кои досега беа ослободени од таа давачка. Тоа е ран знак за потенцијалното влијание на трговската војна врз американските потрошувачи.

Поголемиот дел од зголемувањето на цените во САД се случи во петокот, со маржи значително повисоки во одредени категории во однос на други, посочува „Блумберг њуз“, според податците што ги собра. Просечната цена за 100-те најпродавани производи во категориите убавина и здравје од четвртокот се зголеми за 51 отсто, а цените на неколку артикли се зголемија повеќе од двојно.

Просечниот ценовен скок на производите за домот, кујната и играчките е над 30 проценти, предводен од огромното зголемување на цените - од дури 377 проценти - за сет од 10 кујнски крпи. Женската облека во просек поскапе за осум проценти.

Bloomberg

 

Платформите за е-трговија како што се „Шејн“ и „Тему“ (Temu) се соочуваат со царини од 120 проценти за многу од нивните производи поради одлуката на американската влада да го укине ослободувањето „de minimis“ за мали пакети од континентална Кина и Хонгконг. Извозниците значајно го искористија ослободувањето во последниве години, што овозможи стока во вредност под 800 долари да влегува во САД без царина. Вашингтон ќе ја зголеми и таксата за поштенска пратка за стоката што ќе пристигнува по 2 мај на 100 долари, а по 1 јуни се очекува и дополнително зголемување.

На 21 април во објава на социјалните мрежи Трамп рече дека „практично нема инфлација“ поради падот на цените на енергијата и прехранбените производи. Но, зголемувањето на цените на „Шејн“ ги одразува најновите напори на кинеските онлајн трговци на мало да пренесат барем дел од дополнителните трошоци за увоз на американските потрошувачи.

Уште во февруари, со цел да избегне дел од царинските политики на Трамп, „Шејн“ им понуди стимулации на некои од своите кинески добавувачи да отворат производствени погони во Виетнам.

„Тему“ и „Шејн“ забележаа пораст на продажбата во март и почетокот на април бидејќи американските купувачи се снабдуваа со сè, од четки за шминкање до апарати за домаќинство, обидувајќи се на тој начин „да заштедат“ пред царините да се одразат на крајните цени, покажуваат податоците на „Блумберг“. Двете компании во текот на месецов веќе објавија дека ќе ги зголемат цените во САД.

Генерално, цените на „Шејн“ во САД се зголемија за околу 10 проценти во периодот од 24 до 26 април, врз основа на примерок од кошничката за купување пополнета од „Блумберг њуз“ со 50 артикли од различни категории. Во тој период седум од 50-те испитани артикли беа отстранети од понудата во САД. Спротивно на тоа, цените на „Шејн“ во Велика Британија останаа во голема мера непроменети и ниеден артикл не е отстранет.

Bloomberg

 

Од 43-те артикли што сè уште се достапни во американските кошнички за купување, цените на 30 се зголемија за над 10 проценти и тоа за само два дена.

Сепак, во петокот следеа пообемни корекции на цените, а дел од производите беа поскапени уште во претходните денови. Цените на десетици врвни производи во категоријата женска облека на „Шејн“ се зголемија на 22 април, со што просечната цена за 100-те најдобри производи во категоријата се искачи на 9,06 долари. Споредено со претходната од 8,68 долари, тоа претставува зголемување на просечната цена на овие производи од над четири проценти.

Bloomberg