„Луфтханза“ со загуби, а трговската војна само ја влошува ситуацијата

„Луфтханза“ (Deutsche Lufthansa AG) предупреди дека има само ограничен увид во втората половина од годината, бидејќи трговските тензии и промените во однесувањето на потрошувачите ја доведуваат глобалната економија во хаос.

Најголемата европска авиопревозничка групација соопшти дека макроекономската неизвесност, особено трговскиот конфликт меѓу САД и Европа, ги отежнува прогнозите за клучната летна сезона. „Луфтханза“ формира посебна работна група за следење на побарувачката и приспособување на капацитетот доколку е потребно. Меѓу можните позитивни фактори, тие ги истакнаа пониските цени на горивата, што би можело да ги ублажи евентуалните слабости, соопшти компанијата.

Компанијата пријави зголемување на бројот на патници и приходите на трансатлантските летови во споредба со претходната година, што укажува дека побарувачката на таа клучна рута останува силна, дури и кога некои други превозници предупредија дека почнуваат да забележуваат пад на побарувачката. „Луфтханза“ соопшти дека во март превезла околу 25 проценти повеќе патници од САД до Европа отколку во истиот месец минатата година.

Генерално, „Луфтханза“ ја задржа својата прогноза за регионално повисока приспособена добивка пред камати, даноци и амортизација за 2025 година.

Групацијата регистрира приспособена загуба пред камати и даноци од 722 милиони евра (822 милиони долари) за првите три месеци, во споредба со загубата од 849 милиони евра една година претходно. Приходите се зголемиле за 10 проценти, на 8,13 милијарди евра. Аналитичарите анкетирани од „Блумберг“ предвидоа приспособена оперативна загуба од 747,2 милиони евра.

Матичната авиокомпанија  продолжува да ги оптоварува резултатите на групацијата, поради високите трошоци за персонал и постојаните доцнења на клучните аеродроми во Франкфурт и во Минхен, иако компанијата вели дека проблемите постепено се намалуваат.

До неодамна трансатлантските рути бележеа отпорна побарувачка кај туристичките и деловните патници, дури и кога растеше загриженоста дека имиграциските политики на САД би можеле да го намалат расположението. Во исто време се појавуваат знаци на воздржаност кај потрошувачите, со оглед на тоа што превозници како „Делта ерлајнс“ (Delta Airlines Inc.) и „Американ ерлајнс“ (American Airlines Group Inc.) претходно ги намалија своите прогнози за профит годинава.