Акциите на „Тесла“ потонаа по караницата меѓу Маск и администрацијата на САД

Акциите на „Тесла“ паднаа откако расправијата меѓу Илон Маск и американскиот претседател Доналд Трамп ескалираше во јавна вербална војна меѓу двајцата најмоќни луѓе во светот.

Трамп во четвртокот изјави дека е „многу разочаран“ од критиките на извршниот директор на „Тесла“ за клучниот закон за даноци на претседателот. Маск возврати со неколку објави на социјалните мрежи, од кои во една рече дека „без мене, Трамп ќе ги изгубеше изборите“.

Потоа претседателот се закани дека ќе ги прекине федералните договори и субвенциите за компаниите во сопственост на Маск и рече дека побарал од лидерите на „Тесла“ и „Спејс Икс“ да ја напуштат неговата администрација, потег што Маск го нарече „лажен“. Маск истиот ден подоцна отиде чекор понатаму, најавувајќи дека ќе го повлече од употреба еден од „СпејсИкс“ бродовите, што го користи владата на САД.

 

 

Акциите на „Тесла“ вчера паднаа за 14 проценти на берзата во Њујорк, што е нивниот најголем пад од 10 март. Падот избриша околу 150 милијарди долари од пазарната вредност на производителот на електрични возила. Акциите паднаа за уште два проценти до 16:39 часот по локално време во тргувањето по затворањето на берзата. Спектаклот на најбогатиот човек во светот и лидерот на слободниот свет кои разменуваат навреди преку социјалните медиуми го означува ненадејниот крај на некогаш моќниот политички сојуз.

 

 

Маск потроши повеќе од 250 милиони долари за да му помогне на Трамп да се врати во Белата куќа. Трамп, пак, за возврат го назначи Маск да предводи сеопфатна иницијатива за намалување на владините трошоци и реструктуирање на федералната бирократија, пред непредвидливиот милијардер да се повлече од таа позиција минатата недела.

Рос Гербер, извршен директор на компанијата „Гербер Кавасаки“ (Gerber Kawasaki), акционер на „Тесла“, остро го критикуваше однесувањето на Маск во интервју за „Блумберг ТВ“, велејќи дека тоа може да доведе до тужби од инвеститорите на производителот на автомобили и да ја преполови вредноста на „Спејс Икс“.

„Илон не дејствува во најдобар интерес на своите акционери“, рече Гербер, чија фирма значително го намали својот удел во „Тесла“ во последните неколку години. Кризата води до „распаѓање во реално време на империјата на Маск“. Расправијата му отвора врата на Трамп да ги искористи своите извршни овластувања за да се одмазди против компаниите во сопственост на Маск, слично на дејствијата што претседателот ги презеде против други, како што е Универзитетот Харвард.

Исто така, се поставуваат прашања за тоа дали администрацијата на Трамп ќе ги спроведе клучните промени во политиката што ги бара Маск, особено рамката што би ја либерализирала употребата на автономни возила, за кои Маск вели дека се од суштинско значење за иднината и пазарната вредност на „Тесла“. Политиките што ги спроведуваат Трамп и републиканските пратеници веќе ја чинат „Тесла“, убедливо најголемиот бизнис на Маск, милијарди долари.

Големиот даночен закон на Трамп во голема мера би ги елиминирал субвенциите во вредност до 7.500 долари за купувачите на одредени модели на „Тесла“ и други електрични возила до крајот на оваа година, седум години порано од планираното. Тоа би предизвикало удар од околу 1,2 милијарди долари на годишниот профит на „Тесла“, според аналитичарите на „ЏП Морган“.

Откако минатата недела официјално ја напушти својата советничка позиција во Белата куќа, Маск водеше кампања против клучниот закон за даноци на претседателот, кој го опиша како „одвратна монструозност“. Најбогатиот човек во светот лобира кај републиканските пратеници, вклучително и директен апел до претседателот на Претставничкиот дом, Мајк Џонсон, да ги зачуваат вредните даночни олеснувања за електричните возила во предложениот закон.

Според „ЏП Морган“, посебен закон усвоен од Сенатот, кој ги таргетира регулативите за продажба на електрични возила во Калифорнија, претставува дополнителен удар од две милијарди долари на приходите од регулаторниот кредит на „Тесла“.

 

 

Тие мерки загрозуваат околу половина од над шест милијарди долари профит пред оданочување што Волстрит очекува „Тесла“ да го оствари оваа година, според извештајот од 30 мај на аналитичарите предводени од Рајан Бринкман.

„Тесла“ не одговори на барањата за коментар.

Даночниот закон усвоен од Претставничкиот дом ќе ги укине даночните олеснувања за производство на чиста електрична енергија и тоа повеќе години пред предвидениот рок. Исто така, вклучува строги ограничувања за употреба на кинески компоненти и материјали, за кои аналитичарите велат дека ќе ги направат субвенциите бескорисни и ќе ја ограничат можноста на компаниите да продаваат даночни олеснувања на трети страни.

Одделот за соларна енергија и батерии на „Тесла“ беше особено критичен кон републиканскиот закон за елиминирање на даночните олеснувања за чиста енергија, велејќи дека „ненадејното елиминирање“ на стимулациите би ја загрозило енергетската независност на САД и сигурноста на електричната мрежа.

 

 

Политиките за чиста енергија и електрични возила кои сега се под закана беа во голема мера донесени како дел од Законот за намалување на инфлацијата на поранешниот претседател Џо Бајден. Законот беше дизајниран да ги поттикне компаниите да изградат домашен синџир на снабдување за чиста енергија и електрични возила, давајќи им повеќе пари ако произведуваат повеќе батерии и електрични возила во САД. „Тесла“ е широко распространета во земјата, вклучувајќи фабрики за автомобили во Тексас и Калифорнија, како и рафинерија за литиум и фабрики за батерии.

Благодарение на тие политики од ерата на Бајден, продажбата на електрични возила во САД се зголеми за 7,3 проценти, на рекордни 1,3 милиони возила минатата година, според „Кокс аутомотив“ (Cox Automotive).

Во моментов нема коментари за веста. Биди прв да коментира...

Остави коментар