„Мајкрософт“ (Microsoft Corp.) е на пат да стане втората компанија во светот што достигнала пазарна капитализација од четири трилиони долари, откако ги објави кварталните приходи што ги надминаа очекувањата на Волстрит, што доведе до голем раст на акциите во продолженото тргување во средата.
Акциите на технолошкиот гигант скокнаа и до девет проценти, над 560 долари, во доцното тргување во Њујорк и доколку барем дел од овој раст се задржи до отворањето на пазарите денеска, компанијата ќе достигне пазарна вредност од четири трилиони долари. „Енвидија“ (Nvidia Corp.) претходно месецов стана првата компанија што го достигна овој значаен праг.
Bloomberg
„’Мајкрософт’ го добива заслуженото признание затоа што е оперативниот систем за бизнисите. Сите ние ги водиме своите работи преку ’Мајкрософт’, користејќи Ворд, Аутлук, Ексел“, изјави Ким Форест, главна инвестициска директорка во БЦП (Bokeh Capital Partners LLC). „Резултатите од овој квартал укажуваат на уште посилна позиција за ’Мајкрософт’, бидејќи, исто како и ’Енвидија’, изгледа дека нема замена“.
Најновите резултати на компанијата потврдија дека таа е лидер во областа на вештачката интелигенција, а во последниве години ги подигна акциите на технолошките гиганти со голема пазарна капитализација, како и на поширокиот пазар. „Мајкрософт“ пријави раст во својот бизнис за технологии во облак што ги надмина очекувањата, а неговата внимателно следена единица Ажур (Azure) забележа раст на продажбата од 39 проценти, значително надминувајќи ги очекуваните 34 проценти.
Во обраќањето до аналитичарите, финансиската директорка Ејми Худ изјави дека „Мајкрософт“ во првиот фискален квартал очекува капитални трошоци поголеми од 30 милијарди долари, како и двоцифрен раст на приходите за целата година. Исто така, се очекува Ажур да оствари раст од 37 проценти во првиот квартал, што е над предвидувањата.
Акцијата годинава има втор најдобар перформанс меѓу таканаречените величествени седум мегатехнолошки компании. Од својот пад на 8 април, кога поширокиот пазар го погодија заканите на претседателот Доналд Трамп за обемни царини, акциите скокнаа речиси 45 проценти и затворија малку под рекордниот максимум непосредно пред објавувањето на резултатите во средата.
Оваа година означи извесно закрепнување за „Мајкрософт“. Акциите заостануваа зад конкурентите во текот на 2024 и првиот квартал од 2025 година, единствени од величествените седум што беа во минус во тој период, бидејќи инвеститорите беа загрижени за неговата позиција во вештачката интелигенција и растот на Ажур.
Волстрит генерално е оптимистичен за акциите на „Мајкрософт“: 65 од 72 аналитичари што ја следат компанијата даваат препорака за купување, додека само еден има препорака за продажба, според податоците што ги собра „Блумберг“. Просечната целна цена за наредните 12 месеци од 554 долари имплицира потенцијален раст од околу осум проценти во однос на затворањето во средата.
.webp){kind=icon}
Во моментов нема коментари за веста. Биди прв да коментира...