Повеќе домашни банки деновиве ги активириле хипотеките во обид да ги наплатат долговите кои Бетон АД ги имал кон нив. Од градежната компанија информираат дека кредиторите донеле одлуки да ги доспеат сите кредитни рамки па Комерцијална Банка АД, Стопанска Банка АД Скопје, Халк Банка и НЛБ Банка ги активирале своите хипотеки, како и мениците. Во моментов се извршува сиот недвижен и подвиже имот на Бетон АД.
„Пристапија кон постапка на извршување на целиот недвижен и подвижен имот на компанијата до подмирување на своите побарувања. Компанијата е задолжена и за гаранциите кои компанијата ги обезбеди преку своите кредитори спрема инвеститорот Синохидро за изградба на автопатот Миладиновци – Штип и кои гаранции се уште не се згаснати иако компанијата има добиено потврда од својот инвеститор за успешно завршена работа. Причината за тоа е што Владата се уште не превзела соодветни чекори за надминување на административните проблеми со проектот за изградба на автопатот Миладиновци – Штип чиј инвеститор е ЈПДП, а изведувач Синохидро и во кој ДГ Бетон АД Скопје и Гранит АД Скопје се јавуваат како подизведувачи, а кој проект е завршен повеќе од 3 години и со тоа и ослободување на гаранциите кои и Синохидро ги обезбедил спрема инвеститорот ЈПДП, велат од Бетон.
Во објавата тврдат дека станува збор за гаранции кои се во износ од над 12 милиони евра, средства од рамките кои компанијата не била во можност да ги користи за да учествува на нови тендери повеќе од една година. Тоа според нив имало значајно влијание за неликвидноста на компанијата.
„Уште повеќе, извршувањето банките го спроведуваат на целосните рамки на компанијата, вклучувајќи ги и гаранциите кои веќе треба да бидат згаснати, велат од Бетон.
Додаваат и дека компанијата која сега е во сериозни финансиски проблеми сè уште не може да го предбележи веќе изградениот хотел во центарот на Скопје, за кој има градежна дозвола.
„Имено, Катастарот одбива да го направи истото, поврзувајќи ги законските обврски со политички препукувања и покрај тоа што има добиено конкретни насоки од Кривичниот суд да го спроведе предбележувањето и потврда дека за тоа не постојат никакви законски пречки. Вредноста на активата на компанијата, како и побарувањата од изработените и неисплатени ситуирани работи, како и потенцијалните обештетувања кои ги очекуваме како завршница на сите судски процеси заради нерегуларно раскинување на договори, се драстично поголеми од обврските што ги имаат доверителите и истите ќе бидат подмирени во целост, велат од Бетон.
Блумберг Адриа веќе пишуваше за проблемите со кои се соочува оваа компанија. Во април беше замрзнат нејзиниот имот, а годинешните приходи се значително намалени.
Како што објавиме, прво Јавното претпријатие за државни патишта го раскина договорот со Бетон, со што биле активирани и гаранциите кои компанијата во почетокот на 2022 година била принудена целосно да ги исплати. Во јули и Народна Банка го раскина Договорот за градење на својата административна зграда. За овој договор активирани се гаранции од 2,5милиони евра.
.webp){kind=icon}
