Трамп купил обврзници за 104 милиони долари додека е на функција

Американскиот претседател Доналд Трамп купил стотици обврзници откако се врати на функцијата, вклучувајќи и од американски компании погодени од големите промени во федералните политики што тој ги промовира.

Според документ објавен од Белата куќа во вторникот, со кој се открива инвестициската активност на милијардерот за годинава до почетокот на август, извршени се вкупно 690 трансакции, првата од нив ден веднаш по неговата инаугурација, во вредност од најмалку 103,7 милиони долари.

Освен обврзници издадени од локални власти, училишни одбори, аеродромски власти и гасни дистрикти, Трамп, на 10 февруари купил и корпоративни обврзници во износи од најмалку 500.000 долари од „Квалком“ (Qualcomm Inc.), „Хоум депо“ (Home Depot) и „Т-мобајл САД“ (T-Mobile US Inc.). Подоцна истиот месец купил и корпоративни обврзници од „Мета платформс“ (Meta Platforms Inc.), компанијата што е сопственик на Фејсбук, за најмалку 250.000 долари.

Извештајот, кој мора да го поднесат сите федерални избрани функционери и именувани лица што тргуваат, не содржи точни износи или цени, бидејќи се бараат само широки распони на трансакции со акции, обврзници, стоковни фјучерси и други хартии од вредност. Трамп не пријавил продажби.

Инвестициите претставуваат уште еден пример како претседателот, чија нето-вредност според индексот Bloomberg Billionaires изнесува 6,4 милијарди долари, продолжува да акумулира богатство додека е на функција.

За разлика од своите претходници, Трамп не се ослободи од имотот ниту пак ги префрли своите средства во т.н. слеп фонд (blind trust) со независен управител. Со неговата разгранета бизнис-империја управуваат двајцата негови синови и функционира во повеќе сектори што се преклопуваат со претседателската политика.

Трамп одржал средби со лидери на компании чии синџири на снабдување беа нарушени од неговото воведување на највисоките царини во последниве децении, како и со директори од технолошката индустрија.

Белата куќа не одговори веднаш на барањето за коментар испратено по мејл во врска со поднесокот од 33 страници, кој е со датум од 12 август и е доставен до Канцеларијата за етика на владата.

Во претходен финансиски извештај за имот и приходи што ја опфаќа неговата активност во 2024 година, Трамп навел стотици обврзници во негови лични инвестициски сметки, одвоени од неговата бизнис-империја. Извештајот, пак, опфаќа имоти како неговиот ресорт „Мар-а-Лаго“ (Mar-a-Lago) на Флорида, удел во „Трамп медија и технолоџи груп“ (Trump Media & Technology Group Corp.) и криптопроекти што според индексот на „Блумберг“ му додале најмалку 620 милиони долари на неговото богатство во последниве месеци.

Според федералниот закон за етика, претседателите не се обврзани да се ослободат од имот што може да претставува конфликт на интереси, но досега тоа било практика. Трамп е првиот претседател што го прекршил правилото откако е донесен законот во 1978 година.