Компанијата „Електроник артс“ (Electronic Arts Inc. / ЕА) се согласи на продажба во најголемиот задолжен откуп во историјата, а купувачи се компанијата што ја управува зетот на претседателот Доналд Трамп, Џаред Кушнер, и државниот фонд на Саудиска Арабија.
Оваа огромна трансакција, која ја вреднува компанијата за видеоигри на околу 55 милијарди долари, претставува најнов обид на Саудиска Арабија да го диверзифицира своето портфолио надвор од нафтата, инвестирајќи во спортот и гејминг-индустријата, која е финансиски нестабилна, но сè повеќе е во центарот на младинската култура низ светот.
Јавниот инвестициски фонд на Саудиска Арабија, заедно со СЛМ (Silver Lake Management) и АП (Affinity Partners) на Кушнер, се согласија да платат 210 долари по акција во готовина, што претставува премија од 25 отсто во однос на цената на акциите пред да протечат информации за преговорите во петокот. „ЏП Морган“ (JPMorgan Chase & Co.) обезбедува 20 милијарди долари од долгот, што е најголемата задолжена обврска досега за ваков вид откуп.
Оваа продажба е најновиот показател дека бумот во деловните спојувања и преземања, кој се очекуваше за време на администрацијата на Трамп, почнува да станува реалност, зацврстувајќи го најактивниот квартал за спојувања и преземања во последните три години.
Оваа продажба доаѓа и во посебно турбулентен момент за индустријата за видеоигри, која вреди 178 милијарди долари. За време на првичните заклучувања поради пандемијата, бројот на корисници и самата култура на видеоигри се зголемија, а ТВ-емисиите и филмовите засновани на игри го заземаа врвот на глобалните топ листи. Сето тоа инспирираше компании за видеоигри да го забрзаат развојот на нови, сѐ поскапи наслови, со буџети што често достигнуваат стотици милиони долари.
Сепак, последните месеци, поради вишокот на нови и скапи игри, многу играчи одлучија да им останат верни на старите фаворити наместо да купуваат нови наслови, што доведе до пад на продажбата, масовни отпуштања и затворање студија низ индустријата.
Компанијата ЕА, позната по популарните игри како што се „Батлфилд“ (Battlefield) и „Фудбал клаб“ (EA Sports FC), спаѓа меѓу најголемите компании за видеоигри во САД. Компанијата со седиште во Редвуд Сити, Калифорнија, имаше четири од десетте најпродавани игри минатата година, според податоците на истражувачката компанија „Циркана“ (Circana), а меѓу нив се и спортските игри како НФЛ (Madden NFL).
Компанијата неодамна, по неколку рунди отпуштања, бараше нови области за раст за да ги инспирира играчите што се префрлиле на бесплатни игри што постојано се ажурираат наместо да трошат 80 долари за нови наслови.
Преминот во приватна сопственост ќе ги отстрани пречките во вид на квартални извештаи за заработка и барања од инвеститорите. Силата на EA во спортските игри ѝ дава предвидливи приходи, што ја прави привлечна за компании за приватен капитал.
Bloomberg
Трансакцијата ќе биде финансирана со готовина од партнери во конзорциумот, а Јавниот инвестициски фонд на Саудиска Арабија (ПИФ) ќе ја задржи својата постојна улога од 9,9 отсто во компанијата, што ја носи вкупната инвестиција во капитал на околу 36 милијарди долари. Според извештајот на компанијата, договорот вклучува и надомест за откажување во износ од една милијарда долари во случај да дојде до прекинување на трансакцијата.
За ПИФ Саудиска Арабија, ова е најголемата инвестиција во интерактивна забава, а фондот веќе има значајни вложувања во видеоигри, вклучувајќи и сопственост над креаторот на играта „Покемон го“ (Pokémon Go). Во 2023 година, преку својата подружница СГГ (Savvy Games Group), ја купи компанија „Скопели“ (Scopely Inc.) за 4,9 милијарди долари, стекнувајќи ја и компанијата што ја издаде играта „Монополи го“ (Monopoly Go!).
Поголемиот дел големи трансакции со странски инвеститори бараат одобрување од владата. АП (Affinity Partners), фирмата основана од зетот на Трамп, има поддршка од странски инвеститори, вклучувајќи и некои од Блискиот Исток.
Овој договор го заменува откупот на компанија ТХУ (TXU), вреден околу 45 милијарди долари, од 2007 година, како најголем задолжен откуп во историјата. Истовремено, ова е едно од најголемите спојувања и преземања во 2025 година, што го покажува апетитот на Волстрит за трансакции што можат да ја променат индустријата, и покрај стравовите од рецесија и геополитички прашања што влијаат на пошироката економија.
Акциите на компанијата ЕА пораснаа за 4,8 отсто во понеделникот наутро во Њујорк, достигнувајќи цена од 202,73 долари, што е 3,5 отсто пониско од понудената цена. Компаниите за видеоигри, вклучувајќи ги и „Тејк-ту ИС“ (Take-Two Interactive Software Inc.) и „Роблокс“ (Roblox Corp.), исто така забележаа раст.
Основана во 1982 година, ЕА е еден од најголемите независни издавачи на видеоигри во светот, по неколку години консолидација на индустријата. Компанијата АБ (Activision Blizzard), креатор на популарните игри КОД (Call of Duty), беше преземена од „Мајкрософт“ (Microsoft Corp.) пред две години.
„Нашите креативни и посветени тимови во EA обезбедија врвни искуства за стотици милиони фанови, изградија легендарна интелектуална сопственост и создадоа значителна вредност за нашиот бизнис“, изјави Ендру Вилсон, извршен директор на ЕА. „Овој момент е силно признание за целиот тој труд.“
.webp){kind=icon}
