Комисијата за хартии од вредност на последната седница донесе решение со кое на друштвото за управување со отворени и затворени инвестициски фондови „Опфолио инвестиции“ му се дава одобрение за организирање на два отворени инвестициски фонда – „Опфолио прогресивен фонд“ и „Опфолио паричен фонд“.
Оттаму информираат дека „Опфолио прогресивен фонд“ првенствено е наменет за вложувачи со инвестициски хоризонт на долг рок и повисок степен на толеранција кон ризикот. Како инвеститори на фондот може да се јават домашни и странски, правни и физички лица, а временски период кој е препорачлив за вложување во фондот е пет години. Согласно проспектот, инвеститорите можат да изберат помеѓу два вида на уплати: оптимален и инвестициски план.
„Средствата на фондот ќе бидат инвестирани во следните видови инструменти: акции - преносливи хартии од вредност на издавачи од земјата и странство без географски ограничувања (85 проценти – 100 проценти), инвестициски фондови (0 проценти – 10 проценти), обврзници (0 проценти – 15 проценти), депозити (0 проценти – 15 проценти) и пари на сметка (0 проценти – 15 проценти)“, наведуваат од КХВ.
Прочитај повеќе
„Опфолио Инвестиции“ нов играч на пазарот на капитал
КХВ издаде дозвола друштвото да основа и да управува со отворени инвестициски фондови, да води работи на управување со средства за сметка на индивидуален клиент – сопственик на портфолио и работи на инвестициско советување на клиенти.
30.05.2025
Од КХВ информираат дека „Опфолио паричен фонд“е наменет за домашни и странски, физички и правни лица, кои се карактеризираат со ниска толеранција на ризик и инвестициски хоризонт пократок од една година.
„Инвестициската стратегија е дизајнирана да генерира стабилен и континуиран принос со минимална волатилност на вредноста на уделот, со што се заштитува капиталот од пазарни флуктуации“, велат од КХВ.
Средствата на фондот ќе бидат инвестирани во инвестициски фондови (0 проценти - 10 проценти), вложувања во краткорочни и долгорочни должнички хартии од вредност, независно од инвестицискиот рејтинг на издавачот, чие седиште се наоѓа во земја-членка на ЕУ, ОЕЦД или на пазарите во развој - издавачи на овие финансиски инструменти можат да бидат странски субјекти, вклучувајќи влади, централни банки, компании и финансиски институции (0 проценти – 65 проценти), депозити во овластени банки во Македонија (0 проценти – 100 проценти) и пари на сметка (0 проценти – 25 проценти).
.webp){kind=icon}
