Кинескиот луксузен пазар оживува, ЛВМХ отвора продавници во декември

ЛВМХ (LVMH) ќе отвори неколку големи продавници во Кина во декември и разгледува понатамошна експанзија, велат извори запознаени со плановите, додека брендовите од високата мода гледаат први знаци на закрепнување на продажбата во втората по големина економија во светот.

Според изворите, четири бренда на ЛВМХ – „Луј Витон“ (Louis Vuitton), „Диор“ (Dior), „Тифани“ (Tiffany) и „Лоро Пјана“ (Loro Piana) – треба да отворат повеќекатни продавници во Пекинг во декември, по неколкугодишен период на подготовка. Некои од продавниците, сместени во трговскиот комплекс „Тајку Ли Санлитун“ (Taikoo Li Sanlitun), претходно имаа забавено темпо на изградба поради падот на продажбата на луксузни производи, велат лица запознаени со состојбата.

Луксузниот конгломерат, основан од милијардерот Бернар Арно, наедно води разговори за отворање нова продавница на „Кристијан Диор“ (Christian Dior) – вториот најголем моден бренд на групацијата, по „Луј Витон“ – во еден од препознатливите трговски центри на компанијата во Шангај. Според изворите, продавницата би можела да биде отворена најрано во 2027 година, во „ХКРИ Тајку Хиу“ (HKRI Taikoo Hui).

Експанзијата на луксузниот гигант доаѓа во момент кога се појавуваат знаци дека забавувањето на кинескиот луксузен пазар се стабилизира. ЛВМХ во третиот квартал повторно оствари раст, додека сопственикот на „Гучи“ (Gucci), односно компанијата „Керинг“ (Kering SA), објави помал пад на продажбата од очекуваниот, а глобалните трговски лидери изразија претпазлив оптимизам за закрепнувањето на еден од нивните најважни пазари. Отворањето на новите продавници во Пекинг ќе биде важен тест за тој позитивен тренд.

Иако концептот и деталите за новата продавница на „Диор“ во Шангај сè уште се развиваат, таа ќе биде сместена веднаш до просторот на „Луј Витон“, обликуван како крузер, кој беше отворен во истиот трговски центар на крајот на јуни. Оваа продавница од 17.000 квадратни стапки, една од најголемите на „Луј Витон“ во Кина – предизвика огромен интерес на социјалните мрежи и помогна трговскиот центар да ја удвои својата малопродажна заработка во третиот квартал.

Bloomberg

ЛВМХ сè уште разгледува можности за понатамошна соработка со „Свајер пропертиз“ (Swire Properties), кои би вклучувале трајни и временски ограничени продажни простори, како и големи настани, велат извори запознаени со плановите.

Силното закрепнување на продажбата во главните трговски центри на „Свајер“ низ Кина исто така придонесе за зголемување на довербата. Неговите водечки малопродажни објекти во Пекинг и во Шангај бележат раст на годишно ниво во првите девет месеци од годинава. Така, трговскиот центар „ХКРИ Тајку Хиу“, на пример, забележал скок на продажбата од околу 42 проценти, наспроти пад од 21 процент во истиот период лани. Според соопштението на компанијата, растот во голема мера бил поттикнат од отворањето на продавницата на „Луј Витон“.

По успехот на продавницата на „Луј Витон“, „ХКРИ Тајку Хиу“ и соседниот трговски комплекс „Џангјуен“ (Zhangyuan) продолжуваат да привлекуваат силен интерес од клучни партнери заинтересирани за инвестирање, соопшти портпарол на двете компании. ЛВМХ не одговори на барањето за коментар.

Закрепнување на продажбата
Главните трговски центри на „Свајер“ низ Кина повторно бележат раст

Bloomberg

Новата продавница на „Луј Витон“ вклучува изложбен простор и кафе-бар, со што се нагласува промената во стратегијата на луксузните групации во Кина – тие сè повеќе комбинираат импресивен дизајн и културни атракции во своето присуство, бидејќи богатите потрошувачи сè повеќе ги ценат личното искуство и благосостојба наместо самите етикети.

„Свајер пропертиз“ исто така работи на проширување на проектот „Џангјуен“, заедничко вложување што го претвори 143 години стариот историски комплекс во Шангај во културен и трговски центар. Проширувањето на проектот, кој се наоѓа во близината на „ХКРИ Тајку Хуи“ во централниот трговски дел на финансиското јадро на градот, треба да биде завршено до крајот на 2026 година и, според изворите, ќе има и други брендови од ЛВМХ.

„Луј Витон“ моментално има изложбен простор во „Џангјуен“, а неколку други бренда на ЛВМХ, меѓу кои и „Тифани“ и „Булгари“ (Bvlgari), исто така се претставиле во истиот комплекс.