Компанијата „Беркшир Хатавеј“ (Berkshire Hathaway Inc.), предводена од Ворен Бафет, во третиот квартал купи 17,9 милиони акции на матичната компанија на „Гугл“, „Алфабет“ (Alphabet Inc.), додека истовремено дополнително го намалуваше уделот во „Банка на Америка“ (Bank of America Corp.) и „Епл“ (Apple Inc).
Уделот на „Беркшир“ во „Алфабет“, кој претставува 0,31 отсто од вкупните акции, според регулаторниот извештај од петокот, беше проценет на околу 4,9 милијарди долари на затворањето на пазарот.
Акциите на „Алфабет“ пораснаа за 1,7 отсто на 281 долар во продолженото тргување во 17:05 по њујоршко време.
Бафет, кој планира на крајот на годината да се повлече од позицијата извршен директор, бара начини како да вложи дел од готовината на „Беркшир“, која на крајот на кварталот достигна рекордни 382 милијарди долари. Конгломератот со седиште во Омаха, Небраска, неодамна постигна договор за купување на петрoхемискиот оддел на ОП (Occidental Petroleum Corp.) за 9,7 милијарди долари и стекна удел од 1,6 милијарди долари во „Јунајтед хелт“ (UnitedHealth Group Inc).
„Беркшир“ исто така додаде 4,3 милиони акции на осигурителната компанија „Чаб“ (Chubb Ltd.), со што вредноста на тој удел на крајот на кварталот порасна на 8,8 милијарди долари.
Сепак, компанијата во текот на периодот беше нето-продавач на акции, продавајќи хартии од вредност во вредност од 6,1 милијарди долари.
„Беркшир“ го намали својот удел во „Епл“ за 15 отсто, оставајќи го со удел вреден 60,7 милијарди долари на 30 септември. Производителот на ајфони со седиште во Купертино, Калифорнија, сè уште сочинува речиси четвртина од портфолиото на акции на „Беркшир“.
Конгломератот продаде 37,2 милиони акции на „Банка на Америка“, задржувајќи 7,7 отсто удел во компанијата од Волстрит.
„Беркшир“ исто така ја напушти позицијата во американскиот производител на куќи ДРХ (D.R. Horton Inc.), додека продолжи да го зголемува уделот во „Ленар“ (Lennar Corp).
.webp){kind=icon}
