„Сименс енерџи“ се доближува до вредност од 100 милијарди евра

Само седум дена по падот предизвикан од пошироките пазарни стравувања за балон во вештачката интелигенција, најголемиот европски добитник од тој тренд повторно е близу рекордни нивоа.

Поттикнати од бран аналитички оптимизам и пошироко растење на берзите, акциите на „Сименс енерџи“ (Siemens Energy AG) се зголемени за 13 отсто оваа недела и се движат близу историски максимум, целосно надоместувајќи го пад од 10 отсто од минатиот петок. Тоа ја донесе пазарната вредност на компанијата на чекор до 100 милијарди евра (116 милијарди долари).

„Глобалната побарувачка за електрична енергија расте, особено на пазарите каде што е присутна ‘Сименс енерџи’“, рече аналитичарот Николас Деметер од БМЗС (B Metzler Seel Sohn & Co AG), кој во понеделникот ја подигна препораката за акцијата на „купи“. Тој додаде дека акцијата и понатаму е привлечна поради добрата процена на вредноста и силната листа на нарачки на компанијата.

„Сименс енерџи“ се доближува до пазарна вредност од 100 милијарди евра

Bloomberg

Германската компанија, која во 2020 година беше издвоена од индустрискиот гигант „Сименс“ (Siemens AG), беше најдобрата европска акција во 2024 година, со пораст за 320 отсто благодарение на силната побарувачка за дата-центри, клучна компонента од инфраструктурата за вештачка интелигенција. Оваа година порасна за уште 127 отсто, а се очекува растот да продолжи.

Повеќе од една петтина од аналитичарите што ги следи „Блумберг“ (Bloomberg) ги зголемија своите целни цени за „Сименс енерџи“ откако компанијата минатата недела објави план за откуп до 6 милијарди евра сопствени акции. Иако акцијата следниот ден падна - поради краткорочни инвеститори што земаа профит - реакцијата се случи во момент кога на пазарот се појавија пошироки сомнежи дали големите вложувања во ВИ навистина носат соодветни резултати.

Брокерите остануваат оптимисти. Аналитичарите на „Берeнберг“ (Berenberg), предводени од Ричард Досон, беа меѓу оние што ги подигнаа своите целни цени, наведувајќи дека, иако поширокиот бум кај дата-центрите може да донесе волатилност кај акцијата, прогнозите за растот на добивката и рамката за враќање вредност на акционерите значат дека тие „остануваат позитивни“.

Стравувањата од ВИ-балон не ги поколебаа аналитичарите за „Сименс енерџи“
Брокерите ги зголемија целните цени и покрај падот на акцијата

Bloomberg

Во почетокот на ноември „Сименс енерџи“ значително ги зголеми своите среднорочни финансиски цели поради силната побарувачка за гасни турбини и опрема за дата-центри, како и поради напредокот во реструктурирањето на проблематичната единица за ветерни турбини „Гамеса“.

Компанијата „ја гради енергетската инфраструктура на иднината“, напишаа аналитичарите на „Дојче банк“ (Deutsche Bank AG), предводени од Гел де-Бреј, кои исто така ги зголемија своите целни цени оваа недела.

Како доказ за издржливоста, „Сименс енерџи“ моментално е најсилниот добитник во кошницата европски ВИ-акции на УБС (UBS) за 2025 година и е на пат да ја продолжи победничката низа втора година по ред. Таа покажа отпорност на стравувањата што ги погодуваат другите компании во ВИ-секторот.

„Во последните месеци корелацијата меѓу ВИ-акциите и ‘Сименс енерџи’ беше релативно висока. Но ако се погледне оваа недела, сликата е малку поинаква“, рече Деметер. „‘Сименс енерџи’ има значително подобар резултат од ‘Енвидија’.“