„Абивакс“ е новата европска ѕвезда, со раст на акцијата од 1.300 отсто

Француската биотехнолошка компанија „Абивакс“ (Abivax SA) ја започна 2025 година со пазарна вредност помала од 500 милиони долари, но благодарение на големиот напредок во клиничките испитувања и интересот на берзите, успеа да постигне пазарна капитализација од повеќе од 8 милијарди долари за рекордно време. Ова е, номинално, највисок раст меѓу акциите во европскиот индекс Stoxx 600 во 2025 година.

Растот од над 1.300 отсто само оваа година не се должи само на шпекулации туку е подлабоко вкоренет во резултатите од клиничките испитувања и ревидираните процени на аналитичарите, кои сега го гледаат „Абивакс“ не како играч со висок ризик, туку како потенцијален лидер во терапиите за воспалителни заболувања на цревата.

Пресвртницата за „Абивакс“ се случи во јули, кога компанијата објави позитивни резултати од две клучни индукциски испитувања ABTECT во трета фаза за својот водечки производ, оралната терапија „обефазимод“ (obefazimod) за улцерозен колитис, болест што погодува десетици милиони луѓе низ светот. Податоците покажаа дека дневната доза на „обефазимод“ (50 мг) постигнала стапка на клиничка ремисија од 16,4 проценти во споредба со плацебо по осум недели, според „Инвестинг“ (Investing.com), што значително ги надмина очекувањата на аналитичарите и претходните пазарни процени за оваа фаза од студијата.

Пазарот реагираше речиси веднаш. Во претпазарното тргување на 23 јули, акциите на „Абивакс“ скокнаа за речиси 400 проценти - од околу 10 долари на речиси 50 долари, сигнализирајќи им на инвеститорите дека потенцијалот на компанијата е многу поголем отколку што се сметаше.

Bloomberg

 

„Колку повеќе го проучуваме овој лек, толку повозбудлив станува“, рече Марк де Гаридел, извршен директор на „Абивакс“, во интервју за „Блумберг“ овој месец. „Иако сме мала компанија, сакаме да бидеме предводници со извонреден лек“.

Токму овие импресивни резултати од испитувањата и пошироката потенцијална пазарна вредност на „обефазимод“ создадоа силна основа за институционалните инвеститори и брокерските куќи повторно да ја разгледаат вредноста на „Абивакс“. По објавата на француската компанија во јули, „Морган Стенли“ го зголеми рејтингот на акцијата од „неутрална“ (англ. equalweight - кога аналитичарите веруваат дека акцијата е неутрална во однос на индексот/секторот) на „препорачана за купување“ (англ. overweight - кога аналитичарите веруваат дека акцијата ќе го надмине пазарот или индексот), зголемувајќи ја тогашната целна цена на 71 долар.

„Морган Стенли“ исто така процени дека акцијата на „Абивакс“ би можела да достигне и до 118 долари во оптимистичкото сценарио, додека би можела да падне и до 1 долар во песимистичкото. Ова сугерира дека идната вредност на акцијата во голема мера зависи од успехот во одржувањето на ремисијата и дополнителните податоци за безбедноста на лекот. Во моментов акциите на „Абивакс“ вредат околу 95 евра или 111 долари.

Што нè очекува во декември

Аналитичарите од други фирми исто така ги ревидираа своите процени. „Лиринк партнерс“ (Leerink Partners) ја зголеми својата целна цена на околу 115 долари, истакнувајќи го комерцијалниот потенцијал на „обефазимодот“ и кај улцерозен колитис и кај Кронова болест, додека „Гугенхајм“ (Guggenheim) и „Берклис“ (Barclays) се насочени кон цена помеѓу 142 и 150 долари, велејќи дека оралното земање на лекот го прави „обефазимодот“ особено конкурентен со терапиите што обично се даваат со инјекција или интравенозно.

Иако инвеститорите во моментов се фокусирани на постигнување и одржување на ремисијата кај улцерозен колитис, резултатите од следењето се очекуваат во вториот квартал од 2026 година. Успехот на овие податоци би бил клучен за поднесување регулаторни апликации во САД и ЕУ, со планирани поднесувања за втората половина од следната година и комерцијално лансирање на лекот веќе во третиот квартал од 2027 година.

Овој временски рок исто така ја истакнува двојната природа на инвестицискиот ризик: потенцијалот за високи награди доколку се успешни, но и можноста за значителна нестабилност доколку податоците не ги исполнат очекувањата.

Инвеститорите исто така ја следат можноста за аквизиции. „Траст секјурититис“ (Trust Securities) ја опишува „Абивакс“ како „потенцијална ѕвезда за аквизиции со стратешка привлечност“, додека „Голдман Сакс“ (Goldman Sachs) ја вклучи компанијата во својата листа на „ВИП-акции“ најпосакувани од хеџ-фондовите.

Сепак, компанијата сè уште не генерира конзистентни приходи и работи со негативна добивка пред оданочување - ЕБИТДА, додека брзо троши пари за финансирање клинички програми.

„Фармацевтската индустрија генерално е претпазлива во врска со спојувањата и аквизициите (M&A) - таа претпочита средства што покажале резултати во подоцнежните фази од клиничките испитувања“, вели Џаред Холц од „Мизухо“ (Mizuho).

И покрај ова, Холц останува „голем оптимист“ во врска со краткорочните перспективи за секторот, со оглед на високото ниво на активност за аквизиции во последните месеци. Индексот на биотехнологија Nasdaq Biotechnology е блиску до рекордни максимуми, со пораст од околу 30 проценти оваа година.

„Податоците се клучни“, додава Антоан Папиерник од „Софинова партнерс“ (Sofinnova Partners), инвеститор во „Абивакс“, нагласувајќи дека портфолиото мора да покаже јасни резултати за да привлече интерес од инвеститорите.

Bloomberg

 

Во исто време аналитичарите предупредуваат на ризици: примерот на „Мунлејк имунотерапеутикс“ (MoonLake Immunotherapeutics) покажува колку брзо може да се промени расположението кога испитувањата во подоцнежна фаза не успеваат да ги потврдат очекувањата. Швајцарската биотехнолошка компанија, чиј главен производ беше „сонелокимаб“ (SLK), експериментален лек од нанотела против хронична воспалителна кожна болест хидраденитис супуратива, доживеа драматичен пад на цената на акциите кон крајот на септември 2025 година.

Откако беа објавени резултатите од клучното испитување во третатат фаза (програма VELA), нејзините акции изгубија приближно 90 проценти од нивната вредност за еден ден, паѓајќи од околу 62 долари на само 6 долари по акција. Падот избриша милијарди долари од пазарната капитализација на компанијата практично за миг.

„Абивакс“, која првично го истражуваше „обефазимодот“ како потенцијален третман за ХИВ, во моментов служи како пример за тоа како иновативна биотехнолошка компанија може драматично да ја промени перцепцијата на пазарот во спротивна насока од „Мунлејк имунотерапеутикс“, но не треба да се заборави дека „Мунлејк“ исто така покажа ветување на почетокот.

Комбинацијата од научни иновации, регулаторен напредок и пазарен оптимизам го направи „Абивакс“ една од најинтересните и најследени акции во Европа во 2025 година. Сепак, она што следува е исто толку важно како и оваа „прва фаза“. Без разлика дали порастот на „Абивакс“ е оправдан или не, во овој случај најпрво ќе покажат резултатите – доказите, а не времето.