„Ново Нордиск“ доби одобрение во САД за таблетарна верзија на лекот „вегови“

„Ново Нордиск“ (Novo Nordisk A/S) доби одобрение да продава таблетарна верзија на својот хит-лек против дебелина „вегови“ (Wegovy) во САД, што претставува клучен чекор во напорите да го заштити својот пазарен удел од конкурентот „Ели Лили“ (Eli Lilly & Co.).

Компанијата соопшти дека продажбата на таблетите во САД ќе започне на почетокот на јануари. Лекот е одобрен за помош при слабеење или за долгорочно одржување на веќе постигнатото намалување на телесната тежина.

Акциите на компанијата пораснаа дури за 7,2 отсто во раното тргување во Копенхаген. Акциите на „Ново Нордиск“ годинава паднаа за околу половина, поради загриженост околу способноста на данскиот фармацевтски производител да остане конкурентен на пазарот за лекови против дебелина, кој самиот го постави.

Одобрението се темели на резултатите од студијата „Оазис 4“, која покажа дека лицата што земале таблетa од 25 милиграми еднаш дневно изгубиле околу 13,6 отсто од телесната тежина во период од 64 недели. Компанијата соопшти дека во втората половина на 2025 година поднела барање за одобрение и во Европа, како и во други делови од светот.

Таблетата е клучна за стратегијата на „Ново Нордиск“ да ѝ се спротивстави на „Ели Лили“, која соопшти дека нејзиниот орален лек против дебелина би можел да добие одобрение веќе во март. Тоа би ѝ дало на „Ново Нордиск“ предност од само неколку месеци.

Одобрението за таблетата „ѝ ја обезбедува на ‘Ново Нордиск’ толку потребната победа во услови на неодамнешните предизвици за одржување на пазарната доминација“, напиша во својата анализа аналитичарот Еван Дејвид Сајгерман од БМО (BMO Capital Markets). „‘Ново Нордиск’ ја доби регулаторната трка против ‘Лили’“, оцени тој, додавајќи дека дури и ако предноста биде краткотрајна, компанијата ќе има корист од стартната предност.

Компанијата планира да ја продава таблетата со почетна доза од 1,5 милиграм за пациенти што плаќаат во готово, по цена од 149 долари месечно. „Ново Нордиск“ соопшти дека деталите за цените на повисоките дози и за пациентите со здравствено осигурување ќе бидат објавени кога лекот ќе се појави на пазарот, при што наведе дека цената за пациентите чие осигурување го покрива лекот би можела да биде и до 25 долари месечно, за сите дози.

Таблетата претставува нова и практична опција, изјави извршниот директор Мајк Даустдар. „Ново Нордиск“ тврди дека ниту еден постоен орален третман од класата ГЛП-1 не може да се мери со намалувањето на телесната тежина што го обезбедува таблетата „вегови“, повикувајќи се на проценето намалување од 16,6 отсто, доколку пациентите не ја прекинат терапијата

Таблетата на „Ели Лили“ во посебна студија постигна малку послабо намалување на телесната тежина во споредба со резултатите на „Ново Нордиск“. Сепак, пациентите веројатно ќе можат да ја земаат без строги ограничувања во однос на оброците и пијалаците.

„Ново Нордиск“ во последно време има сè поголеми тешкотии да се справи со конкуренцијата на пазарот за лекови против дебелина, кој во голема мера самиот го создаде. Неговиот водечки лек „вегови“ изгуби дел од позициите во однос на „зепбаунд“ (Zepbound) на „Ели Лили“, откако директна споредбена студија покажа дека „зепбаунд“ може да помогне за поголемо намалување на телесната тежина.

И следната генерација инјекциски лек на „Ново Нордиск“, „кагрисема“ (CagriSema), исто така не испорача толку големо слабеење колку што најавуваше компанијата во студиите.

Данскиот фармацевтски производител соопшти дека лекот ќе го продава и преку платформи за телемедицина, покрај потрадиционалните канали.