Групацијата „Рио Тинто“ (Rio Tinto) и „Фортескју“ (Fortescue Ltd), двата најголеми светски производители на железна руда, го промениле индексот што го користат за формирање на цените на испораките за најголемиот светски потрошувач на суровини. Ова е невообичаена промена, која следуваше по јавните критики на постојниот механизам од страна на државниот кинески купувач ЦМРГ (China Mineral Resources Group).
Според извори запознаени со случајот, кои се повикуваат на известување упатено до челичарници поврзани со ЦМРГ, и „Рио“ и „Фортескју“ ќе престанат да го користат индексот S&P Global Energy Platts Iron Ore - водечки референтен индекс за поморска трговија со железна руда - за долгорочни договори. Изворите побарале анонимност бидејќи не се овластени да зборуваат за медиуми.
„Рио“, кој ќе ја примени промената за товари испорачани во Кина во јануари и февруари 2026 година, ќе премине на алтернативен индекс на железна руда што го објавува „Фастмаркетс“ (Fastmarkets Ltd). Според изворите, оваа промена претставува пробен период во последните два месеца од важноста на долгорочните договори на компанијата со челичарниците. ЦМРГ првично побарал „Рио“ да користи нов домашен кинески индекс на железна руда, но компанијата го одбила тој предлог, додека индексот на „Фастмаркетс“ бил оценет како компромисно решение.
„Фортескју“ ќе користи просек од индексите на кинескиот „Мајстил“ (Mysteel) и индексот Argus Iron Ore. Според изворите, тој пробен аранжман ќе важи за преостанатиот период од долгорочните договори со кинеските челичарници.
Портпаролите на „Рио“ и „Фортескју“ одбиле да коментираат. Од „Ес енд Пи“ соопштиле дека не коментираат за изборот на индекс од поединечни компании, а ЦМРГ не одговорил веднаш на барањето за коментар.
ЦМРГ кон крајот на октомври соопшти дека начинот на кој индустријата ги формира цените е „ирационален“ и под влијание на странски фјучерс-пазари, бидејќи се користат референтни вредности изразени во американски долари. Агенцијата годинава зазеде построг став и отиде дотаму што дури забрани некои производи од железна руда на компанијата БХП (BHP Group), откако преговорите за долгорочни договори влегоа во ќор-сокак. Исто така, се обиде да го зголеми своето влијание преку ограничување на акумулацијата на железна руда во пристаништата и основање странско трговско тело.
Државниот купувач во моментов преговара со други водечки доставувачи за испораки за следната година, вклучувајќи ги БХП (BHP Group) и „Вале“ (Vale SA).
Во рамките на тековните разговори, и „Рио“ и „Фортескју“ се согласиле да ги продолжат долгорочните договори за снабдување со ЦМРГ за шест месеци, до 2026 година, посочуваат изворите. Периодот на продолжување се разликува: постојниот долгорочен договор на „Рио Тинто“ првично треба да истече во февруари следната година, додека договорот на „Фортескју“ треба да заврши овој месец.
Агенцијата „Ројтерс“ претходно извести дека „Рио“ се откажал од индексот Platts, повикувајќи се на известување упатено до клиентите и на трговец запознаен со случајот.
.webp){kind=icon}
