Зошто акцијата на „Мајкрософт“ поевтини по објавата на резултатите?

Трошоците на компанијата „Мајкрософт“ скокнаа на рекордно ниво, растот на продажбата на облак-услугата забави, а загриженоста на инвеститорите дека инвестициите во вештачка интелигенција ќе се исплатат побавно од очекуваното предизвика значително поевтинување на акцијата.

Капиталните трошоци во второто фискално тримесечје достигнаа 37,5 милијарди долари, што е 66 проценти повеќе од минатата година и над очекувањата на аналитичарите, кои изнесуваа 36,2 милијарди долари.

Одделот за облак-услуги Aзур во тримесечјето забележа 38-процентен раст на приходите при прилагодување на валутни ефекти, што беше во согласност со проекциите на аналитичарите. Оваа стапка на раст во споредба со претходното тримесечје забави за еден процентен поен. Компанијата очекува дека продажбата на Азур во тековното тримесечје ќе порасне од 37 до 38 проценти.

Акциите на „Мајкрософт“ во продолженото тргување изгубија приближно 7 проценти, а во Њујорк денот го завршија на 481,63 американски долари.

„Еден од клучните проблеми што ги оптоварува инвеститорите е тоа што капиталните трошоци растат побрзо отколку што очекувавме, а Aзур можеби расте малку побавно од очекувањата,“ изјави Кеит Вајс, аналитичар во „Морган Стенли“. Тој смета дека инвеститорите се загрижени за исплатливоста на овие инвестиции.

Финансиската директорка Ејми Худ појасни дека дел од облачните капацитети се наменети за внатрешните тимови, што ги зајакнува продуктите како Копилот. Доколку сите нови капацитети беа насочени кон Aзур, стапките на раст би биле значително повисоки, рече таа.

Најголемиот светски производител на софтвер во последните години бележи брз раст на облачниот бизнис, делумно и поради пресудното партнерство со водечкиот стартап во областа на вештачката интелигенција „Опен-еј-ај“. И покрај големите инвестиции во дата-центри, „Мајкрософт“ има проблеми доволно брзо да ги стави капацитетите во употреба за да одговори на побарувачката.

„Мајкрософт“ забрзано вградува алатки за вештачка интелигенција во своите производи, вклучително и оние што ги движи „Oпен-еј-ај“, бидејќи се надева дека чат-ботовите и автоматизацијата ќе ја поттикнат продажбата на софтвер за продуктивност и облачни услуги.

Извршниот директор Сатја Надела изјави дека компаниите моментално плаќаат 15 милиони претплати за M365 Копилот, главната алатка на „Мајкрософт“ за вештачка интелигенција за канцелариски корисници. Според него, употребата се зголемува меѓу големата база на корпоративни клиенти.

Вкупните приходи во тримесечјето се зголемија за 17 проценти на 81,3 милијарди долари, а добивката изнесуваше 5,16 долари по акција, соопшти компанијата во средата. На нето-добивката позитивно влијаеја и добивките од инвестицијата на „Мајкрософт“ во „Опен-еј-ај“, кои ја зголемија добивката по акција за 1,02 долари.

Аналитичарите очекуваа приходи во висина од 80,3 милијарди долари и добивка по акција од 3,92 долари.

Вредноста на обврските на клиентите, кои „Мајкрософт“ очекува во наредните години да се реализираат како приходи се удвои во споредба со минатата година, главно поради новиот договор со „Опен-еј-ај“ вреден 250 милијарди долари. Овој стартап претставуваше 45 проценти од заостанатите нарачки на „Мајкрософ“, кои на крајот на декември изнесуваа 625 милијарди долари.

„Мајкрософт“ е првата од трите најголеми компании во облачните услуги што годинава ги објави кварталните деловни резултати. „Алфабет“  ќе ги објави резултатите на 4 февруари, а „Амазон“ ден подоцна.

„Мета платформс“ наиде на попозитивен одѕив кај инвеститорите, откако најави поголеми инвестиции во развојот на бизнисот со вештачка интелигенција отколку што првично беше очекувано. „Мета“, сопственикот на Фејсбук, во средата во рамки на кварталниот извештај за работењето соопшти дека капиталните трошоци на годишно ниво ќе изнесуваат меѓу 115 и 135 милијарди долари, што ја надминува просечната проценка на аналитичарите од 110,6 милијарди долари – акциите во продолженото тргување скокнаа за околу 7 проценти.