Објавена понудата за преземање на „Фабрика Карпош“ од страна на „Сервис Петрол“

„Комерцијална банка“ АД Скопје во име и за сметка на „Сервис Петрол“ ја објави понудата за преземање на сите акции издадени од „Фабрика Карпош“ АД Скопје. Понудата за преземање се однесува на сите 62.078 обични акции со право на глас издадени од „Фабрика Карпош“ АД Скопје. Преземачот се обврзува да ги откупи сите 62.078 обични акции со право на глас по цена од 350 денари по акција.

„Утврдената цена од 350 денари по акција е еднаква со просечната цена на обичните акции издадени од ‚Фабрика Карпош‘ АД Скопје, постигната на Македонската Берза за хартии од вредност во последните 12 месеци пред известувањето за намерата за преземање“, наведува банката.

На имателите на хартии од вредност нема да им се наплатуваат трошоци за прифаќање на понудата за преземање, односно сите трошоци во врска со понудата за преземање ги сноси преземачот. Од банката информираат дека „Сервис Петрол“ на сметка на Централниот депозитар за хартии од вредност предал банкарска гаранција во вкупен износ од 21,7 милиони денари (450.000 евра).

 

Рокот за прифаќање на понудата за преземање започнува на 29.01.2026 година и завршува на 25.02.2026 година. Не се определува најмала количина на обични акции со право на глас на кои се однесува понудата за преземање која треба да биде прифатена за преземањето да се смета за успешно.

„Блумберг Адрија“ веќе пишуваше дека според податоците на Централниот депозитар за хартии од вредност, „Сервис Петрол“ поседува 74,89 проценти од акциите во „Фабрика Карпош“. Во „Фабрика Карпош“ има вкупно 139 акционери. Од нив, седум акционери се правни лица (шест домашни и едно странско), а 132 се физички лица, од кои 20 се лица од странство.