Според изворите запознаени со разговорите, преговорите застанале поради загриженост на некои вработени во „Енвидија“ околу природата на трансакцијата. Двете компании претходно, во септември, објавија дека потпишале меморандум за стратешко партнерство, при што планираа финансирање за нови дата центри и друга инфраструктура за ВИ со користење на компоненти на „Енвидија“. Целта беше да се обезбеди компјутерска моќност од 10 гигавати, што е еквивалентно на врвната потрошувачка на електрична енергија на Њујорк.
Во изјава за „Блумберг њуз“, „Енвидија“ истакна: „Ние сме префериран партнер на 'Опен еј-ај' веќе 10 години. Се радуваме на продолжување на соработката“, но компанијата не ги коментираше деталите за текот на преговорите. Од „Опен еј-ај“ засега немаа официјален коментар.
Според „Волстрит Журнал“, двете страни сега ја преиспитуваат иднината на партнерството. Една од можностите е „Енвидја“ да вложи дел од планираните милијарди како дел од тековната рунда на финансирање на „Опен еј-ај“. „Опен еј-ај“ бара да собере до 100 милијарди долари, додека „Амазон“ (Amazon.com Inc.) преговара за инвестирање до 50 милијарди долари и проширување на договорот за продажба на компјутерска моќ на стартапот.
„Енвидија“, истовремено, продолжува да инвестира и во други компании за вештачка интелигенција. На пример, неодамна објави планови за дополнителни 2 милијарди долари во КВ (CoreWeave Inc.), давател на облачни услуги и клиент на „Енвидија“.
Таквите „циркуларни“ инвестиции, каде компанија инвестира во бизнис кој купува нејзин производ, создаваат загриженост за одржливоста на бумот на ВИ. Извршниот директор на „Енвидија“, Џенсен Хуанг, ја отфрли критиката, велејќи дека овие вложувања претставуваат мал дел од вкупните потребни средства и дека идејата за наводно „циркуларно“ инвестирање е „апсурдна“.
.webp){kind=icon}
